ప్రపంచ విద్యార్థి దినోత్సవం సందర్భంగా వృద్ధులకు అన్నదానం.. నిత్యావసర వస్తువుల పంపిణీ

మార్టూరు, మేజర్ న్యూస్:

ప్రపంచ విద్యార్థి దినోత్సవాన్ని పురస్కరించుకుని వలపర్ల హైస్కూల్ ఇంగ్లీష్ ఉపాధ్యాయుడు తానికొండ రత్నకుమార్ సేవా కార్యక్రమం నిర్వహించారు. స్థానిక అమ్మ ఆశ్రమంలోని వృద్ధులకు అన్నదానం చేయడంతో పాటు వారికి అవసరమైన నిత్యావసర వస్తువులను పంపిణీ చేశారు.
ఈ సందర్భంగా వృద్ధులకు సబ్బులు, టూత్‌పేస్టులు, బ్రష్‌లు, కొబ్బరి నూనె, షాంపూలు, అద్దాలు, దువ్వెనలు, స్వీట్లు, పండ్లు అందజేశారు. వృద్ధుల అవసరాలను గుర్తించి వారికి అండగా నిలవడం అభినందనీయమని పలువురు పేర్కొన్నారు.
గతంలోనూ పలుమార్లు అమ్మ ఆశ్రమంలోని వృద్ధులకు అన్నదానం చేయడంతో పాటు అవసరమైన వస్తువులను అందజేస్తూ సేవాభావాన్ని చాటుకుంటున్న తానికొండ రత్నకుమార్‌కు ఆశ్రమ అధ్యక్షుడు గుంటుపల్లి చందు ప్రత్యేక ధన్యవాదాలు తెలిపారు. ఇలాంటి సేవా కార్యక్రమాలు సమాజంలో మానవత్వం, సేవా స్ఫూర్తిని పెంపొందిస్తాయని ఆయన పేర్కొన్నారు.