మున్సిపల్ ఎన్నికలకు సన్నద్ధం అవుతున్న కాంగ్రెస్ పార్టీ...
అమలాపురం,మేజర్ న్యూస్ రాబోయే మున్సిపల్ ఎన్నికలకు కాంగ్రెస్ పార్టీ నాయకులు, కార్యకర్తలు పూర్తిస్థాయిలో సన్నద్ధం కావాలని డాక్టర్ బి.ఆర్. అంబేద్కర్ కోనసీమ జిల్లా కాంగ్రెస్ పార్టీ అధ్యక్షులు కొత్తూరు శ్రీనివాసరావు పిలుపునిచ్చారు. పట్టణ కాంగ్రెస్ పార్టీ అధ్యక్షులు వంటెద్దు బాబి ఆధ్వర్యంలో బాబి నివాసంలో కాంగ్రెస్ పార్టీ ముఖ్య నేతల విస్తృత స్థాయి సమావేశం జరిగింది. ఈ సమావేశానికి జిల్లా అధ్యక్షుడు కొత్తూరు శ్రీనివాసరావు అధ్యక్షత వహించి మున్సిపల్ ఎన్నికల వ్యూహాలపై పార్టీ శ్రేణులకు దిశానిర్దేశం చేశారు.
సమావేశంలో కొత్తూరు శ్రీనివాసరావు మాట్లాడుతూ మున్సిపల్ ఎన్నికల్లో కాంగ్రెస్ పార్టీ తరఫున సమర్థులైన అభ్యర్థులను బరిలోకి దించుతామని, రేపటిలోగా పోటీ చేసే అభ్యర్థుల ఎంపిక ప్రక్రియను పూర్తి చేస్తామని స్పష్టం చేశారు. అభ్యర్థుల ఎంపిక పూర్తయిన వెంటనే క్షేత్రస్థాయిలోకి వెళ్లి పార్టీ విజయానికి ప్రతి ఒక్కరూ గట్టిగా కృషి చేయాలని, వార్డు స్థాయిలో ప్రజలను కలుస్తూ ప్రజా సమస్యలపై గళమెత్తాలని నాయకులకు సూచించారు. కాంగ్రెస్ పార్టీ సిద్ధాంతాలు, ప్రజా సంక్షేమ విధానాలను ఇంటింటికీ తీసుకెళ్లడం ద్వారా మున్సిపల్ ఎన్నికల్లో ఘన విజయం సాధించడమే లక్ష్యంగా పనిచేయాలని పిలుపునిచ్చారు.
ఈ కీలక సమావేశంలో ఏఐసీసీ సభ్యులు యార్లగడ్డ రవీంద్ర, పీసీసీ సభ్యులు మాచవరపు శివన్నారాయణ, కాంగ్రెస్ పార్టీ ముఖ్య నాయకులు వడ్డీ నాగేశ్వరరావు, కుడిపూడి శ్రీనివాసరావు, ఏలేశ్వరపు రాధాకృష్ణ, రాయుడు వెంకటరమణ, మహబూబ్ షకిల, రాయుడు గంగ భవాని, వాకపల్లి రాంబాబు, దేవరపల్లి రాజేంద్ర బాబు, అరిగెల శ్రీరామ్ మూర్తి తదితరులు పాల్గొని ఎన్నికల కార్యాచరణపై తమ అభిప్రాయాలను పంచుకున్నారు. రానున్న ఎన్నికల్లో ఐక్యంగా పోరాడి పార్టీని విజయపథంలో నడిపించాలని నాయకులంతా ఏకగ్రీవంగా తీర్మానించారు.
