బీసీల రాజకీయ ప్రాతినిధ్యానికి ఎన్టీఆర్ పునాది.
పీలేరు , అక్టోబర్ 11, మేజర్ న్యూస్:స్వర్గీయ నందమూరి తారక రామారావు బీసీలకు స్థానిక సంస్థల్లో 20 శాతం రిజర్వేషన్లు కల్పించి రాజకీయ ప్రాతినిధ్యానికి చారిత్రాత్మక పునాది వేశారని తెలుగు యువత రాష్ట్ర ప్రధాన కార్యదర్శి రాగల ఆనంద్ గౌడ్ పేర్కొన్నారు. ఆ మహానేత ప్రారంభించిన బీసీ సాధికారత ప్రయాణాన్ని ముఖ్యమంత్రి నారా చంద్రబాబు నాయుడు ముందుకు తీసుకెళ్లి రిజర్వేషన్లను 34 శాతానికి పెంచారని గుర్తుచేశారు. బీసీలకు రాజకీయంగా గుర్తింపు, సామాజికంగా గౌరవం, ఆర్థికంగా భరోసా కల్పించడంలో తెలుగుదేశం పార్టీది చారిత్రాత్మక పాత్ర అని స్పష్టం చేశారు.
బీసీల రాజకీయ, సామాజిక, ఆర్థిక అభ్యున్నతే కూటమి ప్రభుత్వ లక్ష్యమని రాగల ఆనంద్ గౌడ్ తెలిపారు. స్థానిక సంస్థల్లో బీసీలకు రిజర్వేషన్లు కల్పించడంతో పాటు, వారి చట్టపరమైన రక్షణకు ప్రభుత్వం చర్యలు చేపడుతోందన్నారు. కొన్ని స్థానిక సంస్థల పదవుల్లో రిజర్వేషన్లు 34 శాతం కంటే తక్కువగా ఉన్న చోట్ల కూటమి పార్టీల తరఫున బీసీలకు 34 శాతం ప్రాతినిధ్యం కల్పించేలా చర్యలు తీసుకోవాలని ప్రభుత్వం నిర్ణయించిందని పేర్కొన్నారు.
గత వైసీపీ ప్రభుత్వ హయాంలో బీసీ రిజర్వేషన్లు 34 శాతం నుంచి 24 శాతానికి తగ్గడం వల్ల బీసీల రాజకీయ ప్రాతినిధ్యానికి తీవ్ర నష్టం జరిగిందని విమర్శించారు. బీసీలకు రాజకీయ అవకాశాలు పెంచడం ద్వారా వారి నాయకత్వాన్ని బలోపేతం చేయాలన్నదే కూటమి ప్రభుత్వ సంకల్పమని అన్నారు.
అలాగే వడ్డెరలకు మైనింగ్ లీజుల్లో 10 శాతం ప్రాధాన్యత, గీత కార్మికులకు ఎక్సైజ్ షాపుల కేటాయింపుల్లో 10 శాతం ప్రాధాన్యత, నాయీ బ్రాహ్మణులకు దేవాలయాల్లో భృతిని రూ.25 వేలకు పెంపు, నేతన్నలకు ఉచిత విద్యుత్, సెలూన్లకు నెలకు 200 యూనిట్ల వరకు ఉచిత విద్యుత్ వంటి చర్యలు వివిధ బీసీ వృత్తి వర్గాలకు అండగా నిలుస్తున్నాయని వివరించారు.
“జయహో బీసీ” అనేది కేవలం నినాదం కాదు. ఎన్టీఆర్ వేసిన పునాదిపై చంద్రబాబు నాయుడు బీసీల రాజకీయ, సామాజిక, ఆర్థిక సాధికారతను ముందుకు తీసుకెళ్తున్నారనడానికి నిదర్శనం. బీసీల అభ్యున్నతి, ఆత్మగౌరవం, సమాన అవకాశాల కల్పనకు కూటమి ప్రభుత్వం కట్టుబడి ఉంది అని రాగల ఆనంద్ గౌడ్ స్పష్టం చేశారు.
