కరీంనగర్ మార్కెట్ యార్డ్ అభివృద్ధికి అన్ని విధాలా సహకారం

 

 

రైతుల సంక్షేమమే ప్రధాన లక్ష్యం.. వారికి నిరంతరం అండగా ఉండాలి

 

వ్యవసాయ సహకార శాఖ మంత్రి తుమ్మల నాగేశ్వరరావు

 

మంత్రిని కలిసిన కరీంనగర్ మార్కెట్ కమిటీ చైర్మన్ ఆకుల నరసన్న..

 

సూర్య కరీంనగర్
 

కరీంనగర్ మార్కెట్ యార్డ్ అభివృద్ధికి అన్ని విధాలా సహకారం అందిస్తామని రాష్ట్ర వ్యవసాయ, సహకార శాఖ మంత్రి తుమ్మల నాగేశ్వరరావు హామీ ఇచ్చారు. రైతుల సంక్షేమమే ప్రభుత్వ ప్రధాన లక్ష్యమని, మార్కెట్‌కు వచ్చే రైతులకు ఎలాంటి ఇబ్బందులు కలగకుండా నిరంతరం అండగా నిలవాలని కరీంనగర్ మార్కెట్ కమిటీ చైర్మన్ ఆకుల నరసన్నకు సూచించారు.

శుక్రవారం హైదరాబాద్‌లో ప్రభుత్వ విప్, పెద్దపల్లి ఎమ్మెల్యే చింతకుంట విజయరమణా రావుతో కలిసి కరీంనగర్ మార్కెట్ కమిటీ చైర్మన్ ఆకుల నరసన్న మంత్రి తుమ్మల నాగేశ్వరరావును మర్యాదపూర్వకంగా కలిశారు. ఈ సందర్భంగా మంత్రిని శాలువాతో ఘనంగా సన్మానించారు. కరీంనగర్ మార్కెట్ యార్డ్ అభివృద్ధికి చేపట్టాల్సిన చర్యలు, మార్కెట్‌ను ఆధునికీకరించేందుకు అవసరమైన నిధుల మంజూరు, రైతులకు మెరుగైన మౌలిక వసతులు కల్పించడం తదితర అంశాలపై మంత్రి తుమ్మల నాగేశ్వరరావుతో నరసన్న చర్చించారు. రాబోయే ధాన్యం కొనుగోలు సీజన్‌లో పెద్ద ఎత్తున కొనుగోళ్లు చేపట్టనున్న నేపథ్యంలో రైతులకు ఎలాంటి ఇబ్బందులు తలెత్తకుండా పకడ్బందీ ఏర్పాట్లు చేస్తున్నట్లు మంత్రికి వివరించారు. ప్రభుత్వ సహకారంతో కరీంనగర్ మార్కెట్ యార్డ్‌లో నిర్మించిన సెంట్రలైజ్డ్ కిచెన్ ద్వారా విద్యార్థులకు అల్పాహారం అందిస్తున్న విషయాన్ని కూడా నరసన్న మంత్రి దృష్టికి తీసుకెళ్లారు. ఇటీవల రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ ఈ సెంట్రలైజ్డ్ కిచెన్‌ను ప్రారంభించినట్లు తెలిపారు.

కరీంనగర్ మార్కెట్ యార్డ్ అభివృద్ధికి అవసరమైన అన్ని చర్యలకు సహకరిస్తామని మంత్రి తుమ్మల నాగేశ్వరరావు హామీ ఇచ్చారని నరసన్న తెలిపారు. రైతుల సంక్షేమానికి ప్రభుత్వం అత్యంత ప్రాధాన్యం ఇస్తోందని, మార్కెట్ కమిటీ ద్వారా రైతులకు మెరుగైన సేవలు అందించేందుకు కృషి చేస్తామని పేర్కొన్నారు. ఈ కార్యక్రమంలో కాంగ్రెస్ నాయకుడు పడాల అజయ్ పాల్గొన్నారు.