ఇంటికి వచ్చిన నక్షత్ర తాబేలు అడవిలోకి..

 

సూర్య కాగజ్‌నగర్‌

 

 కొమురం భీం ఆసిఫాబాద్ జిల్లా కాగజ్ నగర్ మండలంలోని   ఇస్గాం మూడో నంబర్‌ గ్రామ ప్రాంతంలోని మనీష్‌ నివాసానికి రాత్రి కురిసిన వర్షం కారణంగా అరుదైన నక్షత్ర తాబేలు రావడంతో అటవీ అధికారులకు సమాచారం అందింది. రేంజ్‌ అధికారి లక్ష్మీనారాయణ ఆదేశాల మేరకు వేంపల్లి సెక్షన్‌ అధికారి శశిధర్‌బాబు, ఇస్గాం బీట్‌ అధికారి ఎం.వాణి, వాచర్‌ దేవ్‌సింగ్‌ అక్కడికి చేరుకుని తాబేలును సురక్షితంగా స్వాధీనం చేసుకున్నారు. అనంతరం ఇస్గాం పరిధిలోని సురక్షిత అటవీ ప్రాంతంలో వదిలిపెట్టారు.

 

నక్షత్ర తాబేలుకు ప్రత్యేక రక్షణ

 

నక్షత్ర తాబేలు వన్యప్రాణి (సంరక్షణ) చట్టం–1972లోని షెడ్యూల్‌–1లో ఉండటంతో అత్యంత రక్షణ కలిగిన వన్యప్రాణుల జాబితాలో ఉంది. వన్యప్రాణులను ఇంట్లో పెంచడం, అక్రమంగా తరలించడం చట్టరీత్యా నేరమని అటవీ అధికారులు తెలిపారు. నిబంధనలు ఉల్లంఘించిన వారికి సెక్షన్‌ 51 ప్రకారం 3 నుంచి 7 సంవత్సరాల వరకు జైలు శిక్షతో పాటు కనీసం రూ.25 వేల జరిమానా విధించే అవకాశం ఉందని పేర్కొన్నారు.