భూ సమస్యలకు చెక్..!

• ఇమ్మామ్గూడలో రీ-సర్వే పనుల పరిశీలన
• రైతుల భాగస్వామ్యంతో పారదర్శకంగా పూర్తి చేయాలి జిల్లా కలెక్టర్ నారాయణ రెడ్డి 

మహేశ్వరం మండలం ఇమ్మామ్గూడ గ్రామంలో చేపడుతున్న భూముల రీ-సర్వే ప్రక్రియను రంగారెడ్డి జిల్లా కలెక్టర్ సి. నారాయణ రెడ్డి బుధవారం క్షేత్రస్థాయిలో పరిశీలించారు. అదనపు కలెక్టర్ (రెవెన్యూ) కె. చంద్రారెడ్డితో కలిసి రీ-సర్వే పనుల పురోగతిని ఆయన సమీక్షించారు. రీ-సర్వేలో భాగంగా భూముల కొలతలు, హద్దుల నిర్ధారణ తదితర ప్రక్రియలను కలెక్టర్ క్షుణ్ణంగా పరిశీలించారు. సర్వే పనులు నిబంధనల ప్రకారం, పకడ్బందీగా జరుగుతున్నాయా అనే అంశాలను అధికారులను అడిగి తెలుసుకున్నారు. ఈ సందర్భంగా గ్రామ రైతులతో కలెక్టర్, అదనపు కలెక్టర్ నేరుగా మాట్లాడి రీ-సర్వేపై వారి అభిప్రాయాలను తెలుసుకున్నారు. భూముల హద్దులు స్పష్టత చెందడంతో భవిష్యత్తులో భూ వివాదాలు, సంబంధిత సమస్యలు తగ్గడంతో పాటు రికార్డుల విషయంలో రైతులకు స్పష్టత లభిస్తుందని అధికారులు తెలిపారు.రీ-సర్వే విజయవంతంగా పూర్తయ్యేందుకు రైతుల సహకారం కీలకమని అధికారులు పేర్కొన్నారు. సర్వేయర్లు క్షేత్రస్థాయికి వచ్చినప్పుడు రైతులు తమ భూములకు సంబంధించిన వివరాలు, హద్దుల సమాచారాన్ని అందించి సహకరించాలని కోరారు. రైతుల భాగస్వామ్యంతో రీ-సర్వేను పారదర్శకంగా పూర్తి చేయాలని, రైతుల సందేహాలను అక్కడికక్కడే నివృత్తి చేస్తూ ప్రక్రియను ముందుకు తీసుకెళ్లాలని అధికారులను కలెక్టర్ ఆదేశించారు. కార్యక్రమంలో ఏడీఎస్ఎల్ఆర్, మహేశ్వరం తహసీల్దార్, మండల సర్వేయర్, లైసెన్స్డ్ సర్వేయర్లు తదితరులు పాల్గొన్నారు.

(రంగారెడ్డి - మేజర్ న్యూస్)