వాడిన పత్తి పంటల పరిశీలన.. రైతులకు భరోసా!
చౌటుప్పల్‌, మేజర్ న్యూస్: ఎల్‌నినో ప్రభావంతో వర్షపాతం లోటు ఏర్పడి వాడిపోతున్న పత్తి పంటలను వ్యవసాయ ఉత్పత్తి కమిషనర్‌, వ్యవసాయ కార్యదర్శి కే. సురేంద్రమోహన్‌ ఐఏఎస్‌ శుక్రవారం యాదాద్రి భువనగిరి జిల్లా చౌటుప్పల్‌ మండలం ఆరెగూడెంలో పరిశీలించారు. రైతులతో మాట్లాడి పంటల పరిస్థితి, వారు ఎదుర్కొంటున్న ఇబ్బందులను అడిగి తెలుసుకున్నారు.ఈ సందర్భంగా ఆయన మాట్లాడుతూ.. వరికి బదులుగా ఆరుతడి పంటల సాగుపై రైతులు దృష్టి సారించాలని సూచించారు. రైతు ఉత్పత్తిదారుల సంఘాల (ఎఫ్‌పీఓ) ద్వారా పంట ఉత్పత్తులను రైతులే కొనుగోలు చేసి, విక్రయించుకోవడం ద్వారా అధిక లాభాలు పొందవచ్చన్నారు. వరి సాగుకు ప్రత్యామ్నాయంగా ఆయిల్‌పామ్‌ పంటను సాగు చేసి మెరుగైన ఆదాయం పొందే అవకాశాలను వివరించారు.
పత్తి రైతులు తమ సమస్యలను ఆయన దృష్టికి తీసుకెళ్లగా, పంటల పరిస్థితిపై కేంద్ర ప్రభుత్వానికి నివేదిక పంపిస్తామని భరోసా ఇచ్చారు.ఈ కార్యక్రమంలో జిల్లా వ్యవసాయ అధికారి రమణారెడ్డి, జిల్లా ఉద్యానవన శాఖ అధికారి కె. హేమలత, మండల వ్యవసాయ అధికారి ముత్యాల నాగరాజు, ఉద్యాన అధికారి కవిత, వ్యవసాయ విస్తరణ అధికారి వెన్నెల, ఎన్నపల్లి వెంకట్‌రెడ్డి, ఉపసర్పంచ్‌ నిమ్మల సత్యనారాయణ, రైతులు పాల్గొన్నారు.
