సూర్య ఆసుపత్రి రిజిస్ట్రేషన్ రద్దు.. ...ఉత్తర్వులు ఇచ్చిన ఉప వైద్యాధికారి..

 సూర్య మెట్‌పల్లి:  

కరీంనగర్ జిల్లా మెట్‌పల్లి పట్టణంలోని సూర్య  ఆసుపత్రి రిజిస్ట్రేషన్ ను రద్దు చేసినట్లు జిల్లా ఉప వైద్య అధికారి డా. ముస్కు జైపాల్ రెడ్డి తెలిపారు. సూర్య ఆసుపత్రిలో అర్హత లేని వైద్యుడితో  ఈ ఎన్ టి స్పెషలిస్ట్ గా వైద్య సేవలు అందిస్తున్నారనే ఫిర్యాదుల మేరకు  ఈ నెల 2వ తేదీన డా. జైపాల్ రెడ్డి ఆకస్మిక తనిఖీలు నిర్వహించారు. ఈ సందర్భంగా వైద్యుల విద్యార్హతలు, మెడికల్ కౌన్సిల్ రిజిస్ట్రేషన్, ఆసుపత్రి రికార్డులను పరిశీలించారు. తనిఖీల్లో గుర్తించిన అంశాల ఆధారంగా ఆసుపత్రి యాజమాన్యానికి షోకాజ్ నోటీసు జారీ చేసి వివరణ కోరారు. అయితే యాజమాన్యం ఇచ్చిన వివరణ సంతృప్తికరంగా లేకపోవడంతో గురువారం రాత్రి ఆసుపత్రి రిజిస్ట్రేషన్ ను రద్దు చేసినట్లు డా. జైపాల్ రెడ్డి తెలిపారు. విచారణలో అర్హత లేని వైద్యులతో వైద్య సేవలు అందిస్తున్నట్లు తేలిందని, క్లినికల్ ఎస్టాబ్లిష్మెంట్స్ చట్టం ప్రకారం చర్యలు తీసుకున్నామని ఆయన పేర్కొన్నారు. ఆసుపత్రుల్లో నమోదిత, అర్హత కలిగిన వైద్యులతోనే వైద్య సేవలు అందించాలని  సూచించారు. నిబంధనలు ఉల్లంఘించే ఆసుపత్రులపై కఠిన చర్యలు తప్పవని హెచ్చరించారు.