మద్యం తాగి పాఠశాలకు వచ్చిన ఉపాధ్యాయునిపై చర్యలు తీసుకోరా?*

మౌనం వహిస్తున్న ఎంఈఓ,డిఈ ఓ* *నేరేడుచర్ల, మేజర్ న్యూస్:*నేరేడుచర్ల మున్సిపాలిటీ పరిధిలోని రాజీవ్‌నగర్ ప్రాథమిక పాఠశాలలో ఓ ఉపాధ్యాయుడు మద్యం సేవించి విధులకు హాజరయ్యారన్న ఆరోపణలు, డ్రింకింగ్ టెస్ట్‌లో 196గా నమోదైనట్లు వచ్చిన వార్త స్థానికంగా చర్చనీయాంశంగా మారింది. ఈ వ్యవహారంపై గతంలో వార్తలు వచ్చినప్పటికీ ఇప్పటివరకు ఎటువంటి చర్యలు తీసుకోకపోవడంపై పలు ఆరోపణలు వస్తున్నాయి.

రిపోర్ట్ పంపానంటున్న ఎంఈఓ.. రాలేదంటున్న డీఈఓ.ఈ వ్యవహారంపై ఎంఈఓను వివరణ కోరగా, తాను పూర్తి వివరాలతో కూడిన రిపోర్ట్‌ను పై అధికారికి, డీఈఓకు పంపించానని చెప్పారు. అయితే డీఈఓ  నుంచి  ఇప్పటివరకు ఎలాంటి రిపోర్ట్ అందలేదని చెప్తున్నారు. దీంతో అసలు రిపోర్ట్ ఎక్కడికి వెళ్లింది? ఎప్పుడు పంపారు? అనే ప్రశ్నలు తలెత్తుతున్నాయి.

ఎంఈఓ రిపోర్ట్ పంపినట్లు చెబుతుండగా, డీఈఓ కార్యాలయానికి రిపోర్ట్ అందలేదని చెప్పడం అధికారుల మధ్య సమన్వయంపై అనుమానాలకు తావిస్తోంది. ఈ విషయంలో వాస్తవాలను అధికారులు స్పష్టం చేయాల్సిన అవసరం ఉందని స్థానికులు అంటున్నారు.సమాచారం ఇవ్వడమేనా.. తదుపరి చర్యలు ఏవి?ఉపాధ్యాయుడిపై వచ్చిన ఆరోపణలు నిజమా కాదా అనేది తేల్చాల్సిన బాధ్యత సంబంధిత విద్యాశాఖ అధికారులదే. రిపోర్ట్ పంపినట్లయితే దానిపై ఉన్నతాధికారులు ఎలాంటి చర్యలు తీసుకున్నారు? విచారణ చేపట్టారా? అనే విషయాలను వెల్లడించాల్సి ఉంది.“రిపోర్ట్ పంపాం” అని ఎంఈఓ చెబుతుండగా, “రిపోర్ట్ రాలేదు” అని డీఈఓ స్థాయి నుంచి సమాచారం వస్తే ఈ వ్యవహారం ఎక్కడ నిలిచిపోయిందో అధికారులు చెప్పాలని తల్లిదండ్రులు కోరుతున్నారు.విద్యార్థుల భద్రతపై స్పష్టత కావాలి.

పాఠశాలలో విధులు నిర్వహించే ఉపాధ్యాయుడిపై మద్యం సేవించి వచ్చినట్లు ఆరోపణలు రావడం సాధారణ విషయం కాదని స్థానికులు పేర్కొంటున్నారు. ఆరోపణలు నిజమైతే శాఖాపరమైన చర్యలు తీసుకోవాలని, ఆరోపణలు నిరాధారమైతే విచారణ ద్వారా వాస్తవాలను వెల్లడించాలని వారు కోరుతున్నారు.ఈ వ్యవహారంలో రిపోర్ట్ పంపిన తేదీ, అందిన తేదీ, దానిపై చేపట్టిన చర్యలు ఏమిటో విద్యాశాఖ అధికారులు ప్రజలకు స్పష్టం చేయాలని స్థానికులు డిమాండ్ చేస్తున్నారు. విద్యార్థుల భద్రత, పాఠశాల ప్రతిష్ఠకు సంబంధించిన అంశంలో జాప్యం లేకుండా పూర్తి స్థాయి విచారణ జరిపి వాస్తవాలను బయటపెట్టాలని కోరుతున్నారు.