అసెంబ్లీ పరిణామాల తర్వాత బీఆర్ఎస్ గ్రాఫ్ భారీగా పడిపోయింది: సీఎం రేవంత్ రెడ్డి

సూర్యా న్యూస్ డెస్క్

శాసనసభ సమావేశాలు, తాజా రాజకీయ పరిణామాలపై ప్రభుత్వం నిర్వహించిన ఫ్లాష్ సర్వేలో విపక్ష బీఆర్ఎస్ పార్టీ గ్రాఫ్ దెబ్బతిన్నట్లు తేలిందని సీఎం రేవంత్ రెడ్డి వెల్లడించారు. సీఎల్పీ భేటీలో ఆయన మాట్లాడుతూ ప్రతిపక్షాల అసత్య ప్రచారాలను తిప్పికొట్టాలని ప్రజాప్రతినిధులకు పిలుపునిచ్చారు.

రాష్ట్రంలో ఇటీవల జరిగిన శాసనసభ సమావేశాలు, తదనంతరం చోటుచేసుకున్న రాజకీయ పరిణామాలపై నిర్వహించిన ఫ్లాష్ సర్వేలో ప్రభుత్వానికి ప్రజామద్దతు స్పష్టంగా కనిపిస్తోందని ముఖ్యమంత్రి ఎనుముల రేవంత్ రెడ్డి స్పష్టం చేశారు. అసెంబ్లీ సమావేశ హాలులో జరిగిన కాంగ్రెస్ లెజిస్లేచర్ పార్టీ (సీఎల్పీ) సమావేశంలో ఆయన పాల్గొని కీలక వ్యాఖ్యలు చేశారు. గత మూడు రోజులుగా అసెంబ్లీలో జరిగిన పరిణామాలు, ప్రతిపక్షాల వైఖరిపై తాము చేయించిన ప్రత్యేక సర్వేలో బీఆర్ఎస్ పార్టీ గ్రాఫ్ గణనీయంగా పడిపోయినట్లు వెల్లడైందని ఆయన తెలిపారు.

ఈ సమావేశంలో అసెంబ్లీ సమావేశాల సందర్భంగా మంత్రులు, ప్రభుత్వ విప్‌లు, పార్టీ ఎమ్మెల్యేలు ప్రదర్శించిన సమన్వయం, పనితీరును సీఎం అభినందించారు. ఇదే ఉత్సాహంతో ప్రభుత్వ సంక్షేమ పథకాలను ప్రజల్లోకి తీసుకెళ్లాలని సూచించారు. ముఖ్యంగా నిషేధిత భూముల జాబితా '22ఏ' అంశంపై ప్రతిపక్షాలు కావాలనే తప్పుడు ప్రచారాలు చేస్తూ రైతులను, పేదలను గందరగోళానికి గురిచేస్తున్నాయని రేవంత్ రెడ్డి మండిపడ్డారు. ప్రభుత్వం చేపడుతున్న ప్రజా సంక్షేమ చర్యలను తప్పుదోవ పట్టించేలా విపక్షాలు చేస్తున్న అసత్య ఆరోపణలను ఎప్పటికప్పుడు తిప్పికొట్టాలని పార్టీ శ్రేణులకు దిశానిర్దేశం చేశారు.  

ఈ సందర్భంగా మాజీ మంత్రి హరీశ్‌రావుపై సీఎం తీవ్రస్థాయిలో విమర్శలు గుప్పించారు. ధరణి పోర్టల్ అడ్డుపెట్టుకుని గతంలో జరిగిన భూ ఆక్రమణలు, అవకతవకలకు సంబంధించిన పూర్తి స్థాయి సమాచారం, చిట్టా తమ వద్ద సిద్ధంగా ఉందని హెచ్చరించారు. త్వరలోనే బీఆర్ఎస్ నేతల అక్రమాలను ప్రజల ముందు బట్టబయలు చేస్తామని స్పష్టం చేశారు. ప్రజాప్రతినిధులు ఎక్కడా ఆత్మరక్షణలో పడకుండా, ప్రభుత్వ విధానాలను గర్వంగా ప్రజలకు వివరించాలని సీఎల్పీ భేటీలో సీఎం దిశానిర్దేశం చేశారు.