మృతుల కుటుంబాలకు రూ. 2 లక్షల పరిహారం ప్రకటించిన ప్రధాని మోదీ

నాందేడ్: మహారాష్ట్రలోని నాందేడ్-భోకర్ రహదారిపై ఘోర రోడ్డు ప్రమాదం చోటుచేసుకుంది. సీతాఖండి ఘాట్ సమీపంలో ప్రయాణికులతో వెళ్తున్న వ్యాన్‌ను వేగంగా వచ్చిన ట్రక్కు ఢీకొనడంతో ఆరుగురు అక్కడికక్కడే మృతి చెందగా, మరో ఎనిమిది మంది తీవ్రంగా గాయపడ్డారు. ఈ ప్రమాద ధాటికి వ్యాన్ తీవ్రంగా ధ్వంసమైంది. ప్రమాదాన్ని గమనించిన స్థానికులు వెంటనే స్పందించి క్షతగాత్రులను వాహన శిథిలాల నుండి బయటకు తీసి చికిత్స నిమిత్తం సమీప ఆస్పత్రులకు తరలించారు.

ఈ విషాద సంఘటనపై ప్రధాన మంత్రి నరేంద్ర మోదీ తీవ్ర విచారం వ్యక్తం చేశారు. మృతుల కుటుంబాలకు తన ప్రగాఢ సానుభూతి తెలిపిన ప్రధాని, గాయపడిన వారు త్వరగా కోలుకోవాలని ఆకాంక్షించారు. బాధితులకు ఊరటగా ప్రధాన మంత్రి జాతీయ సహాయ నిధి (PMNRF) నుండి మృతుల కుటుంబాలకు ఒక్కొక్కరికి రూ. 2 లక్షలు, క్షతగాత్రులకు రూ. 50 వేల చొప్పున పరిహారం అందిస్తామని ప్రధాని కార్యాలయం (PMO) వెల్లడించింది. కాగా, ప్రమాదానికి గల కారణాలపై పోలీసులు కేసు నమోదు చేసుకుని దర్యాప్తు చేస్తున్నారు.