రుద్రప్రయాగ కొండచరియల విలయం

సూర్య జాతీయ డెస్క్: ఉత్తరాఖండ్‌లోని రుద్రప్రయాగ జిల్లా పరిధిలో కొండచరియలు విరిగిపడటంతో కేదార్‌నాథ్ యాత్రా మార్గంలో చిక్కుకుపోయిన సుమారు 9,000 మంది యాత్రికులను రాష్ట్ర విపత్తు నిర్వహణ బలగాలు (SDRF) అత్యంత చాకచక్యంగా రక్షించాయి. కేదార్‌నాథ్ కాలినడక మార్గంలోని చీర్‌బాసా (Chirbasa) వద్ద ఎగువ కొండల నుంచి భారీ బండరాళ్లు, మట్టి పెళ్లలు విరిగిపడటంతో రాకపోకలు పూర్తిగా స్తంభించిపోయాయి. దీంతో దర్శనానికి వెళ్లేవారితో పాటు దర్శనం ముగించుకుని తిరుగు ప్రయాణమైన వేలాది మంది భక్తులు మార్గమధ్యంలో చిక్కుకుపోయి తీవ్ర భయాందోళనలకు గురయ్యారు.

సమాచారం అందుకున్న వెంటనే ఎస్డీఆర్ఎఫ్ రెస్క్యూ బృందాలు ఘటనా స్థలానికి చేరుకుని సంయుక్త సహాయక చర్యలు చేపట్టాయి. ఒకవైపు నిరంతరం రాళ్లు పడుతున్నప్పటికీ ప్రాణాలకు తెగించి రక్షణ వలయాన్ని ఏర్పాటు చేశాయి. సుమారు 1,500 మంది యాత్రికులను అత్యంత ప్రమాదకరమైన జారే ప్రాంతం దాటించి గౌరీకుండ్ వైపు తరలించగా, మిగిలిన వేలాది మంది భక్తులను విడతల వారీగా సురక్షిత ప్రాంతాలకు చేర్చారు. వృద్ధులు, మహిళలు, చిన్నారులను భద్రతా సిబ్బంది స్వయంగా చేయిపట్టి నడిపిస్తూ ధైర్యం చెప్పారు.

చిక్కుకున్న యాత్రికులకు స్థానిక యంత్రాంగం సహకారంతో తాగునీరు, ఆహారం, అత్యవసర వైద్య సదుపాయాలు కల్పించారు. కొండచరియలు పడిన మార్గంలో శిథిలాలను తొలగించి రాకపోకలను పునరుద్ధరించే పనులను యుద్ధప్రాతిపదికన చేపట్టారు. వాతావరణ పరిస్థితులు పూర్తిగా కుదుటపడే వరకు యాత్రికులు అప్రమత్తంగా ఉండాలని, భద్రతా సిబ్బంది సూచనలను పాటించాలని అధికారులు విజ్ఞప్తి చేశారు. విపత్కర పరిస్థితుల్లో శ్రమించి వేలాది మంది ప్రాణాలను కాపాడిన ఎస్డీఆర్ఎఫ్ బలగాల సాహసోపేత చర్యలను యాత్రికులు, ఉన్నతాధికారులు ప్రశంసించారు.