భారతీయ రైల్వే చరిత్రలో సరికొత్త రికార్డు.. ఒక్కరోజే 20 లక్షలకు పైగా టికెట్ల బుకింగ్!
సూర్యా న్యూస్ డెస్క్
ప్రయాణికుల రద్దీతో ఇండియన్ రైల్వే క్యాటరింగ్ అండ్ టూరిజం కార్పొరేషన్ (IRCTC) సరికొత్త మైలురాయిని అధిగమించింది. ఒకే రోజులో ఏకంగా 20 లక్షలకు పైగా రైలు టికెట్లు బుక్ కావడం ద్వారా సరికొత్త ఆల్ టైమ్ రికార్డు నమోదు చేసినట్లు అధికారిక వర్గాలు వెల్లడించాయి.
దేశీయ ప్రయాణ రంగంలో ఇండియన్ రైల్వేస్ మరో చారిత్రక రికార్డును తన ఖాతాలో వేసుకుంది. పండగ సీజన్ సమీపిస్తున్న తరుణంలో ప్రయాణికుల నుంచి రైలు టికెట్లకు డిమాండ్ విపరీతంగా పెరిగింది. ఈ నేపథ్యంలో ప్రయాణికుల రిజర్వేషన్ సిస్టమ్ (PRS) మరియు ఐఆర్సీటీసీ (IRCTC) ప్లాట్ఫారమ్ ద్వారా ఒక్క రోజులోనే ఊహించని స్థాయిలో టికెట్ల బుకింగ్లు నమోదయ్యాయి. చరిత్రలో ఎన్నడూ లేనివిధంగా కేవలం ఒక్క రోజు వ్యవధిలోనే 20 లక్షలకు పైగా టికెట్లు అమ్ముడవ్వడం గమనార్హం
రాబోయే పండుగ సెలవులు, ముందస్తు రిజర్వేషన్ల (ARP) గడువు మరియు ప్రయాణికుల రద్దీ కారణంగా ఒక్కసారిగా డిజిటల్ ప్లాట్ఫారమ్లపై ఒత్తిడి పెరిగినప్పటికీ, సిస్టమ్ ఎలాంటి అంతరాయాలకు లోనుకాకుండా సజావుగా పనిచేసిందని రైల్వే అధికారులు తెలిపారు. ఇంత భారీ సంఖ్యలో ప్రయాణికులు ఏకకాలంలో టికెట్లు బుక్ చేసుకోవడం రైల్వే డిజిటల్ సేవల సామర్థ్యానికి నిదర్శనమని నిపుణులు అభిప్రాయపడుతున్నారు. గత రికార్డులను సైతం తిరగరాస్తూ నమోదైన ఈ గణాంకాలు రైల్వే ప్రయాణాల ప్రాధాన్యతను మరోసారి స్పష్టం చేశాయి.
దేశంలోని వివిధ ప్రాంతాలకు రాకపోకలు సాగించే ప్రయాణికులు తమ ప్రయాణాలను ముందుగానే ప్లాన్ చేసుకుంటున్నారని చెప్పడానికి ఈ రికార్డు బుకింగ్సే నిదర్శనం. ప్రయాణికుల రద్దీకి తగినట్లుగా రాబోయే రోజుల్లో మరిన్ని ప్రత్యేక రైళ్లను నడిపేందుకు రైల్వే శాఖ ఏర్పాట్లు చేస్తోంది. తద్వారా పండగ రద్దీని సులభంగా తట్టుకోవడంతో పాటు ప్రయాణికులకు ఎలాంటి అసౌకర్యం కలగకుండా చూస్తామని అధికారులు పేర్కొంటున్నారు.
