హౌతీల విజృంభణ
దక్షిణ యెమెన్కు వేలాది మంది పలాయనం
ఏడెన్: యెమెన్లో హౌతీ మిలిటెంట్లు విరుచుకుపడుతుండటంతో దేశంలో తీవ్ర భయాందోళనలు వ్యక్తమవుతున్నాయి. ఎర్ర సముద్ర తీరం వెంబడి ఉన్న సౌదీ మద్దతుగల ప్రభుత్వ బలగాలను చిత్తు చేసిన ఇరాన్ అనుకూల హౌతీలు, అత్యంత కీలకమైన బాబ్ ఎల్-మండేబ్ జలసంధిపై తమ పట్టును మరింత బిగించారు. దీంతో ప్రాణభయంతో వేలాది మంది యెమెనీయులు తమ నివాసాలను, సామాన్లను వదిలేసి దక్షిణ నగరమైన ఏడెన్లోని తాత్కాలిక పునరావాస శిబిరాలకు పారిపోతున్నారు.
తాజా ఘర్షణల కారణంగా ఇప్పటివరకు లక్ష మందికి పైగా ప్రజలు దేశంలోనే నిరాశ్రయులయ్యారని, వేలాది మంది సముద్ర మార్గం గుండా జిబూటీకి పారిపోయారని ఐక్యరాజ్యసమితి శరణార్థుల సంస్థ (UNHCR) వెల్లడించింది. అభద్రతా భావం, దెబ్బతిన్న రహదారులు, నెట్వర్క్ అంతరాయాల వల్ల బాధితులకు మానవతా సహాయం అందించడం పెద్ద సవాలుగా మారిందని ఐరాస ఆందోళన వ్యక్తం చేసింది.
హోర్ముజ్ జలసంధితో పాటు ఎర్ర సముద్ర తీర ప్రాంతాల్లో హౌతీలు నియంత్రణ సాధించడంతో ప్రపంచ ఇంధన మార్కెట్లపై తీవ్ర ఒత్తిడి పెరుగుతోంది. సౌదీ అరేబియాలోని కీలక ప్రాంతాలపై జరిగిన దాడుల కారణంగా అక్కడ ప్రధానమైన తూర్పు-పశ్చిమ చమురు పైప్లైన్ తాత్కాలికంగా మూతపడింది. 2014 నుండి అంతర్యుద్ధంలో నలిగిపోతున్న యెమెన్లో 2022 నాటి కాల్పుల విరమణ తర్వాత మళ్లీ ఈ స్థాయిలో ఘర్షణలు చెలరేగడంతో తీవ్ర మానవతా సంక్షోభం నెలకొంది.
