భారత్ ఒక బాధ్యతాయుతమైన భద్రతా భాగస్వామి
ఫిలిప్పీన్స్ రాయబారి
న్యూఢిల్లీ:గత దశాబ్ద కాలంలో భారత్, ఫిలిప్పీన్స్ మధ్య దౌత్య సంబంధాలు గణనీయంగా బలపడ్డాయని, గతేడాది ఈ సంబంధాలు ‘వ్యూహాత్మక భాగస్వామ్య’ స్థాయికి చేరుకున్నాయని భారత్లోని ఫిలిప్పీన్స్ రాయబారి జోసెల్ ఎఫ్ ఇగ్నాసియో అన్నారు. ఇండియన్ కౌన్సిల్ ఆఫ్ వరల్డ్ అఫైర్స్ (ICWA) రజతోత్సవ వేడుకల ముగింపు సభలో మంగళవారం ఆయన ప్రసంగించారు. సముద్ర భద్రతా రంగంతో పాటు మారుతున్న అంతర్జాతీయ పరిస్థితుల నేపథ్యంలో భారతదేశాన్ని ఒక బాధ్యతాయుతమైన శక్తిగా, ప్రాధాన్యత కలిగిన భద్రతా భాగస్వామిగా ఫిలిప్పీన్స్ భావిస్తోందని ఆయన స్పష్టం చేశారు.
ఇదే కార్యక్రమంలో పాల్గొన్న చిలీ రాయబారి జువాన్ రోలాండో అంగులో మోన్సాల్వే మాట్లాడుతూ.. లాటిన్ అమెరికాలో భారత్ గొప్ప ‘సాఫ్ట్ పవర్’ కలిగిన స్నేహపూర్వక ప్రజాస్వామ్య దేశంగా పేరొందిందని కొనియాడారు. సాంకేతికత, ఐటీ, ఫార్మా, అంతరిక్ష రంగాల్లో భారతదేశ బలాన్ని ఆయన ప్రముఖంగా ప్రస్తావించారు.
ఈ ముగింపు సమావేశంలో ప్రసంగించిన విదేశాంగ మంత్రి డాక్టర్ ఎస్. జైశంకర్.. భారత్ యొక్క విస్తరిస్తున్న ఆర్థిక సామర్థ్యాలు, గ్లోబల్ సౌత్ దేశాలతో ఉన్న బలమైన బంధాలు మరియు స్వతంత్ర విదేశాంగ విధానం గురించి వివరించారు. మేధో బృందాలు, విద్యావేత్తల వేదికగా ICWA ప్రపంచానికి భారతదేశ దృక్పథాన్ని తెలియజేస్తూ కీలక పాత్ర పోషిస్తోందని ఆయన పేర్కొన్నారు.
