న్యూయార్క్లో ఫ్రాన్స్, ఈక్వెడార్ విదేశాంగ మంత్రులతో జైశంకర్ కీలక భేటీ
సూర్య జాతీయ డెస్క్: ఐక్యరాజ్యసమితి సర్వసభ్య సమావేశాలు మరియు కీలక చర్చల వేదికగా భారత విదేశాంగ మంత్రి డాక్టర్ ఎస్. జైశంకర్ దౌత్యపరమైన వ్యూహాలకు పదును పెట్టారు. న్యూయార్క్ పర్యటనలో భాగంగా ఆయన ఫ్రాన్స్ విదేశాంగ మంత్రి జీన్-నోయెల్ బారోట్, ఈక్వెడార్ విదేశాంగ మంత్రి రాబర్టో కురీలతో వేర్వేరుగా సమావేశమై పలు ద్వైపాక్షిక, అంతర్జాతీయ అంశాలపై విస్తృతంగా చర్చించారు. ఐక్యరాజ్యసమితి భద్రతా మండలిలో సమగ్ర సంస్కరణలు తీసుకురావాలని భారత్ నిలకడగా వినిపిస్తున్న గొంతుకకు బలం చేకూర్చేలా ఈ సమావేశాలు ప్రాధాన్యత సంతరించుకున్నాయి.
ఫ్రాన్స్ విదేశాంగ మంత్రి జీన్-నోయెల్ బారోట్తో జరిగిన భేటీలో భారత్ మరియు ఫ్రాన్స్ దేశాల మధ్య ఉన్న ప్రత్యేక ప్రపంచ వ్యూహాత్మక భాగస్వామ్యాన్ని మరింత ముందుకు తీసుకెళ్లడంపై ప్రధానంగా దృష్టి సారించారు. ఉక్రెయిన్ యుద్ధం, గల్ఫ్ ప్రాంతంలో నెలకొన్న తీవ్ర ఉద్రిక్తతలు మరియు ప్రాంతీయ భద్రతా సవాళ్లపై ఇరు దేశాల మంత్రులు తమ అభిప్రాయాలను పంచుకున్నారు. ప్రపంచవ్యాప్తంగా మారుతున్న భౌగోళిక రాజకీయ పరిస్థితులకు అనుగుణంగా బహుళపక్ష వేదికల్లో పరస్పర సహకారం అందించుకోవాలని నిర్ణయించారు.
అనంతరం ఈక్వెడార్ విదేశాంగ మంత్రి రాబర్టో కురీతో జరిపిన చర్చల్లో ఇంధనం, ఫార్మాస్యూటికల్స్, రవాణా మరియు సిబ్బంది శిక్షణ వంటి కీలక రంగాల్లో ద్వైపాక్షిక సంబంధాలను మరింత బలపరచుకోవడంపై అంగీకారానికి వచ్చారు. సామర్థ్య నిర్మాణం, సాంకేతిక పరిజ్ఞాన మార్పిడి విభాగాల్లో భారత్ అందిస్తున్న సహకారాన్ని ఈక్వెడార్ కొనియాడింది. గత ఐదేళ్లలో వందలాది మంది ఈక్వెడార్ నిపుణులు భారత శిక్షణా ప్రాజెక్టుల ద్వారా లబ్ధి పొందగా, ఐటి రంగంలోనూ విస్తృత సహాయం అందుతోంది. ఐక్యరాజ్యసమితి వంటి అంతర్జాతీయ వేదికలపై గ్లోబల్ సౌత్ దేశాల పాత్రను పెంపొందించే దిశగా భారత్ నిరంతరం కృషి చేస్తోందని ఈ భేటీల ద్వారా స్పష్టమవుతోంది.
