కెనడాపై అమెరికా సైనిక దాడి ముప్పు: అత్యంత అరుదైన రిస్క్ మేనేజ్మెంట్లో భాగంగానే ప్రణాళికలు.. ప్రధాని మార్క్ కార్నీ సంచలన వ్యాఖ్యలు
సూర్య అంతర్జాతీయ డెస్క్: అత్యంత సన్నిహిత మిత్రదేశాలుగా ఉన్న అమెరికా, కెనడాల మధ్య సంబంధాలు గత కొంతకాలంగా ఉద్రిక్తతల నడుమ కొనసాగుతున్న వేళ కెనడా ప్రధానమంత్రి మార్క్ కార్నీ చేసిన వ్యాఖ్యలు అంతర్జాతీయ స్థాయిలో తీవ్ర ప్రకంపనలు సృష్టిస్తున్నాయి. అమెరికా అధ్యక్షుడు డొనాల్డ్ ట్రంప్ కెనడాపై సైనిక దాడికి ఆదేశించే అవకాశాన్ని తాము పరిగణనలోకి తీసుకున్నామని, ఆ 'అత్యంత అరుదైన రిస్క్' (ఎక్స్ట్రీమ్ టైల్ రిస్క్) దృష్ట్యా ముందస్తు వ్యూహాలను పరిశీలించామని మార్క్ కార్నీ సంచలన వ్యాఖ్యలు చేశారు. న్యూయార్క్ టైమ్స్కు ఇచ్చిన ప్రత్యేక ఇంటర్వ్యూలో ఆయన ఈ వివరాలను పంచుకుంటూ, ఒక బాధ్యతాయుతమైన దేశాధినేతగా అత్యంత తీవ్రమైన విపత్కర పరిస్థితులకు సైతం సన్నద్ధం కావడం రిస్క్ మేనేజ్మెంట్లో భాగమని, అలా సిద్ధపడకపోవడం బాధ్యతారాహిత్యమే అవుతుందని స్పష్టం చేశారు.
గతంలో డొనాల్డ్ ట్రంప్ కెనడాను అమెరికాలో 51వ రాష్ట్రంగా కలపాలంటూ చేసిన వ్యాఖ్యలు, సరిహద్దు సుంకాలు (టారిఫ్లు) విధించడం, వలసల అంశంపై కెనడా స్వయం నాశనం చేసుకుంటోందంటూ సోషల్ మీడియాలో చేసిన విమర్శలతో ఇరుదేశాల మధ్య తీవ్ర వాణిజ్య, దౌత్య వివాదం మొదలైంది. ఈ నేపథ్యంలో ఊహించని పరిణామాలు ఎదురైతే సైనికపరంగా ఏ విధమైన సవాళ్లు ఎదురవుతాయనే దానిపై కెనడా రక్షణ వర్గాలు వివిధ కోణాల్లో మోడలింగ్ చేశాయని కథనాలు వెలువడ్డాయి. అయితే ప్రధాని కార్నీ సైనిక చర్య తప్పనిసరిగా జరుగుతుందని తాను చెప్పడం లేదని, అత్యల్ప సంభావ్యత కలిగిన ఒక సంక్షోభాన్ని సమర్థవంతంగా ఎదుర్కొనేందుకు ఆలోచించడం సాధారణ ప్రక్రియ మాత్రమేనని వివరించారు.
కెనడా రక్షణ మంత్రి డేవిడ్ మెక్గింటీ కూడా ఈ అంశంపై స్పందిస్తూ, ప్రపంచవ్యాప్తంగా అన్ని దేశాల సైనిక బలగాలు భద్రతాపరమైన విపత్కర పరిస్థితులను అంచనా వేస్తూ నిరంతరం సమీక్షలు జరుపుతుంటాయని, ఇది సాధారణ వ్యూహాత్మక చర్య మాత్రమేనని పేర్కొన్నారు. మరోవైపు అమెరికా సాంకేతికత, సైనిక సామగ్రిపై కెనడా ఆధారపడటాన్ని తగ్గించేందుకు మార్క్ కార్నీ ప్రభుత్వం చర్యలు వేగవంతం చేసినట్లు తెలుస్తోంది. అమెరికాకు చెందిన ఎఫ్-35 యుద్ధ విమానాల కొనుగోలు పునఃసమీక్షతో పాటు ఎలాన్ మస్క్కు చెందిన స్టార్లింక్ నెట్వర్క్కు ప్రత్యామ్నాయాలను అన్వేషిస్తున్నట్లు ప్రధాని కార్నీ సంకేతాలు ఇచ్చారు. మిత్రదేశాల మధ్య సైనిక దాడి సాధ్యాసాధ్యాలపై సాక్షాత్తూ దేశ ప్రధానే బహిరంగంగా మాట్లాడటం అంతర్జాతీయ దౌత్య వర్గాల్లో పెను చర్చకు దారితీసింది.
