ఓటీటీలోకి ఊర్వశి సైకలాజికల్ థ్రిల్లర్ 'ఆశ'.. అక్టోబర్ 16 నుంచి ఐదు భాషల్లో స్ట్రీమింగ్!
సూర్య ఎంటర్‌టైన్‌మెంట్ డెస్క్: వర్సటైల్ యాక్ట్రెస్ ఊర్వశి ప్రధాన పాత్రలో నటించిన సైకలాజికల్ థ్రిల్లర్ చిత్రం 'ఆశ' డిజిటల్ ప్రిమియర్ కోసం సిద్ధమైంది. నూతన దర్శకుడు సఫర్ సనల్ అద్భుతమైన కథాంశంతో తెరకెక్కించిన ఈ చిత్రం ప్రముఖ ఓటీటీ వేదిక జీ5 లో అక్టోబర్ 16 నుంచి స్ట్రీమింగ్ కానుంది. థియేటర్లలో విమర్శకుల ప్రశంసలు పొందిన ఈ చిత్రం మలయాళంతో పాటు తెలుగు, తమిళం, కన్నడ మరియు హిందీ భాషల్లో కూడా అందుబాటులోకి రానుంది. వినాయక అజిత్ నిర్మించిన ఈ చిత్రంలో జోజు జార్జ్, ఐశ్వర్య లక్ష్మి, విజయరాఘవన్, లక్ష్మీ మీనన్, భాగ్యలక్ష్మి కీలక పాత్రల్లో నటించి మెప్పించారు.
మాతృత్వం, నైతిక విలువలు మరియు మానవ ప్రవర్తన ఆధారంగా సాగే ఒక సస్పెన్స్ డ్రామాగా ఈ 'చిత్రం'రూపొందింది. ఒక సాధారణ మహిళ జీవితంలో జరిగిన రోడ్డు ప్రమాదం ఎలాంటి తీవ్ర పరిణామాలకు దారితీసింది అనే కథాంశంతో సినిమా సాగుతుంది. భర్తను కోల్పోయి కూతుళ్లే ప్రపంచంగా బతికే ఆశ అనే మహిళ, తన కుటుంబాన్ని కాపాడుకోవడానికి చేసే ప్రయత్నాలు మరియు ఆమె తీసుకునే చిన్న చిన్న నిర్ణయాలు జీవితాలను ఎలా మార్చేసాయి అనే విషయాలను దర్శకుడు ఎంతో ఉత్కంఠభరితంగా ఆవిష్కరించారు.
ఈ చిత్రంలో ఏ పాత్రనూ కేవలం మంచి లేదా చెడు అని విడదీసి చూపించకుండా, పరిస్థితులకు అనుగుణంగా మనుషులు ఎలా ప్రవర్తిస్తారు అనే బటర్ ఫ్లై ఎఫెక్ట్ ఇతివృత్తాన్ని ప్రధానంగా తీసుకున్నారు. ఒక సాధారణ తల్లి అసాధారణమైన పరిస్థితుల్లో చిక్కుకున్నప్పుడు ఎదుర్కొనే ఆత్మసంఘర్షణను నటి ఊర్వశి తన అద్భుతమైన నటనతో ఆవిష్కరించారని మేకర్స్ తెలిపారు. సాధారణ ప్రతీకార కథల తరహాలో కాకుండా పాత్రల నిర్ణయాలు, వాటి పర్యవసానాల చుట్టూ కథ నడవడం ఈ సినిమా ప్రత్యేకత.
ఆలోచింపజేసే కథాంశాలు ఉన్న చిత్రాలను ప్రోత్సహించడంలో భాగంగానే ఈ వైవిధ్యమైన థ్రిల్లర్‌ను ఐదు భాషల్లో ప్రేక్షకుల ముందుకు తీసుకువస్తున్నట్లు జీ5 ప్రతినిధులు వెల్లడించారు. సఫర్ సనల్ దర్శకత్వ ప్రతిభ, ఊర్వశి నటన ఈ చిత్రానికి ప్రధాన బలంగా నిలిచాయని కొనియాడారు. థియేటర్లలో మిస్ అయిన ఓటీటీ ప్రియులకు అక్టోబర్ 16 నుంచి ఈ థ్రిల్లర్ మూవీ ఒక కొత్త అనుభూతిని అందించనుంది.
Also Read: బాక్సాఫీస్ దగ్గర చిన్న సినిమా పెద్ద సంచలనం.. 78 కోట్లు కొల్లగొట్టిన 'ప్రేమనే ఊరిలో'!
