పెళ్లి హామీ ఇచ్చి.. సహజీవనం చేశాడని ఆరోపణలు! సినీ నటి ఫిర్యాదుతో డైరెక్టర్ పవన్ సాధినేని అరెస్ట్

టాలీవుడ్‌లో మరో వివాదం కలకలం రేపుతోంది. ప్రముఖ దర్శకుడు పవన్ సాధినేని అరెస్ట్ కావడం సినీ వర్గాల్లో హాట్ టాపిక్‌గా మారింది. పెళ్లి చేసుకుంటానని నమ్మించి, ఆ తర్వాత మాట మార్చి తనను మోసం చేశాడంటూ ఓ సినీ నటి పోలీసులను ఆశ్రయించినట్లు తెలుస్తోంది. ఈ ఫిర్యాదుపై గోల్కొండ పోలీసులు కేసు నమోదు చేసి పవన్ సాధినేనిని అదుపులోకి తీసుకున్నారు. అనంతరం ఆయనను రిమాండ్‌కు తరలించినట్లు సమాచారం.

ప్రేమ.. సహజీవనం.. ఆ తర్వాత పెళ్లి విషయంలో వివాదం?

పోలీసులకు ఇచ్చిన ఫిర్యాదులో బాధిత నటి పలు ఆరోపణలు చేసినట్లు తెలుస్తోంది. పవన్ సాధినేని ప్రేమ పేరుతో తనను నమ్మించారని, చాలాకాలం పాటు తనతో కలిసి ఉన్నారని ఆమె ఆరోపించినట్లు సమాచారం. పెళ్లి చేసుకోవాలని కోరిన తర్వాత పరిస్థితులు మారిపోయాయని, తనకు దూరంగా ఉండటం ప్రారంభించారని ఫిర్యాదులో పేర్కొన్నట్లు తెలుస్తోంది.

నటి ఫిర్యాదు ఆధారంగా గోల్కొండ పోలీసులు కేసు నమోదు చేసి దర్యాప్తు ప్రారంభించారు. ఈ క్రమంలోనే పవన్ సాధినేనిని అరెస్ట్ చేసి కోర్టులో హాజరుపరిచిన అనంతరం రిమాండ్‌కు తరలించినట్లు సమాచారం.

కెరీర్‌లో మంచి గుర్తింపు.. ఇంతలోనే అరెస్ట్‌తో షాక్

దర్శకుడిగా పవన్ సాధినేని ‘ప్రేమ ఇష్క్ కాదల్’ సినిమాతో టాలీవుడ్‌లోకి ఎంట్రీ ఇచ్చారు. ఆ తర్వాత ‘సావిత్రి’, ‘సేనాపతి’ వంటి చిత్రాలతో తన మార్క్ చూపించారు. సినిమాలతో పాటు ‘కమిట్మెంటల్’ వంటి వెబ్ సిరీస్‌తోనూ మంచి గుర్తింపు తెచ్చుకున్నారు.

ప్రస్తుతం పవన్ సాధినేని దుల్కర్ సల్మాన్ హీరోగా ‘ఆకాశంలో ఒక తార’ చిత్రాన్ని తెరకెక్కిస్తున్నారు. గీతా ఆర్ట్స్, స్వప్న సినిమా సమర్పణలో సందీప్ గుణ్ణం, రమ్య గుణ్ణం ఈ సినిమాను నిర్మిస్తున్నారు. సినిమా విడుదలకు సన్నాహాలు జరుగుతున్న వేళ పవన్ సాధినేనిపై కేసు, అరెస్ట్ వార్తలు రావడం టాలీవుడ్‌లో చర్చనీయాంశంగా మారింది.

గమనిక: పవన్ సాధినేనిపై వచ్చినవి ఫిర్యాదుదారు చేసిన ఆరోపణలు మాత్రమే. కేసు దర్యాప్తు, కోర్టు విచారణ పూర్తయ్యే వరకు ఆరోపణలను నిర్ధారిత వాస్తవాలుగా పరిగణించకూడదు