సోనీలివ్‌లో 'ఐస్' వెబ్ సిరీస్ రివ్యూ.. క్రైమ్‌ను ముందే పసిగట్టే సరికొత్త థ్రిల్లర్
సూర్య ఎంటర్‌టైన్‌మెంట్ డెస్క్: సోనీ లివ్‌లో తెలుగులో స్ట్రీమింగ్ అవుతున్న మలయాళ క్రైమ్ థ్రిల్లర్ వెబ్ సిరీస్ ఐస్ ప్రేక్షకులను విశేషంగా ఆకట్టుకుంటోంది. వేధింపులను ముందుగానే గుర్తించి అడ్డుకునే సరికొత్త సాఫ్ట్‌వేర్ కాన్సెప్ట్‌తో ఈ సిరీస్‌ను దర్శకుడు మనూ అశోకన్ తెరకెక్కించారు. ఏడు ఎపిసోడ్స్‌గా రూపొందిన ఈ సీజన్‌లో నటీనటుల అద్భుతమైన ప్రదర్శన మరియు ఉత్కంఠభరితమైన కథనం ప్రేక్షకులను కట్టిపడేస్తున్నాయి.
మహిళలపై జరిగే అఘాయిత్యాలు మరియు వేధింపులను నేరం జరగకముందే పసిగట్టి అడ్డుకుంటే ఎంతో మంది ప్రాణాలను కాపాడవచ్చనే వినూత్న ఆలోచనతో ఈ కథ నడుస్తుంది. విద్య అనే సాఫ్ట్‌వేర్ కంపెనీ ఓనర్ తయారు చేసిన ఐస్ అనే సాఫ్ట్‌వేర్ చుట్టూ ఈ పూర్తి కథ తిరుగుతుంది. తన స్నేహితురాలైన సైకాలజిస్ట్, క్రైమ్ ఎనలిస్ట్ ఆయేషా సాయంతో ఈ ప్రాజెక్ట్‌ను ఆమె ముందుకు తీసుకెళ్తుంది. పోలీసు అధికారుల సహకారంతో ట్రయిల్ బేస్‌లో కొన్ని టెస్ట్ కేసులను టేకప్ చేసి బాధితులను, స్టాకర్లను ఈ డివైస్ ద్వారా గమనించడం ప్రారంభిస్తారు.
ఈ ఆపరేషన్ సమయంలో ఊహించని పరిణామాలు ఎదురుకావడం, ఒక స్టాకర్ ఆత్మహత్య చేసుకోవడం వంటి సంఘటనలు కథను ఒక్కసారిగా కీలక మలుపు తిప్పుతాయి. ఆ తర్వాత విద్య తన ఇగోలను పక్కన పెట్టి మళ్లీ టీమ్‌ను ఏకం చేయడం, టేకప్ చేసిన కేసుల్లోని నలుగురు బాధితుల నేపథ్యాలు ప్రేక్షకులలో ఉత్కంఠను రేకెత్తిస్తాయి. నటీనటులైన శ్రుతి రామచంద్రన్, నిఖిలా విమల్ తమ పాత్రల్లో జీవించి అద్భుతమైన అభినయాన్ని ప్రదర్శించారు.
ఇన్వెస్టిగేటివ్ క్రైమ్ థ్రిల్లర్ జోనర్ ఇష్టపడే వారికి ఈ వెబ్ సిరీస్ ఒక మంచి అనుభూతిని ఇస్తుంది. సాంకేతికతను క్రైమ్ కంట్రోల్‌కు ఎలా ఉపయోగించవచ్చనే పాయింట్ బాగుంది. కథనంలో కొన్ని చోట్ల నెమ్మదించినా, ఓవరాల్‌గా ఈ సిరీస్ ప్రేక్షకులను ఆద్యంతం అలరిస్తూ ఆలోచింపజేసేలా సాగుతుంది.
Also Read: జొన్నగిరి వజ్రాల నేపథ్యంలో దేవకట్టా 'జో జో'.. ఆకట్టుకుంటున్న 'కాషన్ 1' గ్లింప్స్!
