విజయవాడ సెంట్రల్‌లో కూటమి విజయమే లక్ష్యం
29 కార్పొరేటర్ స్థానాల్లోనూ గెలుపే ధ్యేయం: బొండా ఉమా
విజయవాడ సెంట్రల్, మేజర్ న్యూస్: త్వరలో జరగనున్న స్థానిక సంస్థల ఎన్నికల్లో సీట్ల పంపకాలపై చర్చించేందుకు ఎన్టీఆర్ జిల్లా జనసేన పార్టీ అధ్యక్షుడు, మాజీ మంత్రి సామినేని ఉదయభాను శనివారం విజయవాడ సెంట్రల్ నియోజకవర్గ తెలుగుదేశం పార్టీ కార్యాలయంలో ప్రభుత్వ విప్, ఎమ్మెల్యే బొండా ఉమామహేశ్వరరావును మర్యాదపూర్వకంగా కలిశారు. ఈ సందర్భంగా టీడీపీ, జనసేన, బీజేపీ పార్టీల మధ్య సమన్వయంతో ముందుకు సాగుతూ విజయవాడ నగరపాలక సంస్థపై కూటమి జెండా ఎగురవేయడమే లక్ష్యంగా పనిచేయాలని ఇరువురు నేతలు చర్చించారు. సీట్ల పంపకాల విషయంలో పరస్పర అవగాహనతో వ్యవహరిస్తూ, ప్రతి డివిజన్‌లో కూటమి అభ్యర్థుల విజయానికి సమష్టిగా కృషి చేయాలని అభిప్రాయపడ్డారు. ఈ సందర్భంగా బొండా ఉమామహేశ్వరరావు మాట్లాడుతూ విజయవాడ సెంట్రల్ నియోజకవర్గ పరిధిలో జనసేన పార్టీకి 10 కార్పొరేటర్ స్థానాలు కేటాయించాలని ఆ పార్టీ నాయకులు కోరినట్లు తెలిపారు. మిత్రధర్మాన్ని పాటిస్తూ మూడు పార్టీల మధ్య స్నేహపూర్వక వాతావరణంలో చర్చలు జరిపి, పరస్పర సమన్వయంతో ముందుకు సాగుతామని పేర్కొన్నారు. నియోజకవర్గంలోని మొత్తం 29 కార్పొరేటర్ స్థానాల్లోనూ కూటమి అభ్యర్థులు విజయం సాధించేలా కృషి చేస్తామని ధీమా వ్యక్తం చేశారు. ముఖ్యమంత్రి నారా చంద్రబాబు నాయుడు నాయకత్వంలో అమలవుతున్న అభివృద్ధి, సంక్షేమ కార్యక్రమాలు ప్రజలకు మేలు చేస్తున్నాయని, కేంద్ర, రాష్ట్ర ప్రభుత్వాలతో పాటు స్థానిక సంస్థల్లోనూ కూటమి బలపడితే అభివృద్ధి కార్యక్రమాలను మరింత వేగంగా ముందుకు తీసుకెళ్లేందుకు అవకాశం ఉంటుందని తెలిపారు. టీడీపీ, జనసేన, బీజేపీ నాయకులు, కార్యకర్తలు సమన్వయంతో పనిచేస్తూ స్థానిక సంస్థల ఎన్నికల్లో కూటమి విజయానికి కృషి చేస్తారని పేర్కొన్నారు.
✍️ ప్రేమ్ రాజ్, విజయవాడ, ఎన్టీఆర్ జిల్లా.
