సర్దుబాటుపై కుస్తీపట్లు

అమరావతి, సూర్య ప్రధాన ప్రతినిధి :ఆంధ్రప్రదేశ్‌లో స్థానిక సంస్థల ఎన్నికల వేళ కూటమిలో సీట్ల సర్దుబాటు కసరత్తు తుది దశకు చేరింది. ముఖ్యమంత్రి చంద్రబాబు నాయుడు నివాసంలో జనసేన నేతలతో సుదీర్ఘంగా చర్చలు జరుగుతున్నాయి. దాదాపు 3 గంటలుగా మున్సిపల్ కార్పొరేషన్లు, మున్సిపాలిటీల కేటాయింపుపై తీవ్ర కసరత్తు కొనసాగుతోంది.
ఈ చర్చల సరళిని, పురోగతిని జనసేన అధినేత, డిప్యూటీ సీఎం పవన్ కల్యాణ్‌కు వివరించేందుకు ఆ పార్టీ నేత, మంత్రి నాదెండ్ల మనోహర్ వెళ్లారు. పవన్ కల్యాణ్‌తో చర్చించి ఆయన అభిప్రాయాలు, మార్గదర్శకాలను తెలుసుకున్న తర్వాత నాదెండ్ల మనోహర్ మరోసారి సీఎం చంద్రబాబును కలిసి తుది జాబితాపై భేటీ కానున్నారు.
ఇదిలా ఉంటే, ఈ పొత్తులో భాగంగా జనసేన పార్టీ రాష్ట్రవ్యాప్తంగా 6 కార్పొరేషన్లు, 40 మున్సిపాలిటీలను కేటాయించాలని గట్టి పట్టుపట్టింది. అయితే, కొన్ని స్థానాలపై టీడీపీ అభ్యంతరాలు వ్యక్తం చేస్తుండటంతో సీట్ల సర్దుబాటుపై సందిగ్ధత వీడలేదు. నేతల మధ్య జరుగుతున్న ఈ తాజా సమావేశాలతో ఇవాళ స్పష్టత వచ్చే అవకాశం ఉంది.