ప్లాన్లో కృష్ణ లీలలు... కబ్జాకు విజయ మార్గం!
ప్లాన్లో ‘కృష్ణ’ లీలలు.. కబ్జాకు ‘విజయ’ మార్గం!
కోట్లాది రూపాయల కామన్ సైట్‌పై కన్ను!
లేఅవుట్ అంతా ఒక లెక్క.. ప్రజావసర స్థలానికి మరో లెక్క!
నగర నడిబొడ్డున కోట్లాది రూపాయల విలువైన కామన్ సైట్‌పై నిర్మాణ వివాదం
ఇతర ప్లాట్లకు లేఅవుట్ ప్రకారమే అనుమతులు.. కామన్ సైట్ విషయంలో నిబంధనలకు విరుద్ధంగా వ్యవహరించారనే ఆరోపణలు
సీనియర్ స్ట్రక్చరల్ ఇంజినీర్ రూపొందించిన ప్లాన్‌కు ఆమోదం.. నిర్మాణం ప్రారంభం అధికారుల పరిశీలనలో లోపాలు.. షోకాజ్ నోటీసులు, సెక్షన్ 450 కింద చర్యల ప్రతిపాదన హైకోర్టులో పిటిషన్ ఉపసంహరణ.. ఇంజినీర్ లైసెన్స్‌పై కఠిన చర్యల పరిశీలన
సూర్య బ్యూరో, కాకినాడ: నగర నడిబొడ్డున కోట్లాది రూపాయల విలువైన ప్రజావసర స్థలం. ఆమోదిత లేఅవుట్‌లో భాగంగా ప్రజల కోసం కేటాయించిన కామన్ సైట్. అదే లేఅవుట్‌లో ఇతర ప్లాట్లు కొనుగోలు చేసినవారు నిబంధనల ప్రకారం నిర్మాణ అనుమతులు పొందారు. కానీ కామన్ సైట్ విషయంలో మాత్రం కథ మారింది. నిర్మాణ నిబంధనలపై పట్టున్న ఓ సీనియర్ లైసెన్స్‌డ్ స్ట్రక్చరల్ ఇంజినీర్ తన వృత్తిపరమైన నైపుణ్యాన్ని ఉపయోగించి వివాదాస్పద స్థలానికి నిర్మాణ ప్లాన్ రూపొందించారన్న ఆరోపణలు వెలుగుచూశాయి. ఆ ప్లాన్‌కు అనుమతి లభించింది. నిర్మాణం ప్రారంభమైంది. విషయం ఉన్నతాధికారుల దృష్టికి వెళ్లడంతో మున్సిపల్ యంత్రాంగం కదిలింది. షోకాజ్ నోటీసులు జారీ అయ్యాయి. ప్లాన్ రద్దుకు చర్యలు ప్రతిపాదించారు. వ్యవహారం హైకోర్టుకు చేరింది. చివరకు పిటిషన్ ఉపసంహరణతో వ్యాజ్యం ముగిసింది. ఇప్పుడు సంబంధిత ఇంజినీర్ వృత్తిపరమైన బాధ్యత, లైసెన్స్‌పై చర్యలు ప్రధాన అంశాలుగా మారాయి.
లేఅవుట్ అంతా ఒక లెక్క.. కామన్ సైట్‌కు మరో లెక్క!
ఆమోదిత లేఅవుట్‌లోని రోడ్లను వినియోగించుకుంటూ ఇతర ప్లాట్ల యజమానులు నిర్మాణ అనుమతులు పొందారు. అదే లేఅవుట్‌లో ప్రజావసరాల కోసం కేటాయించిన కామన్ సైట్‌ను ప్రైవేటు నిర్మాణానికి వినియోగించేందుకు ప్రయత్నించారన్నది ప్రధాన ఆరోపణ. కామన్ సైట్‌ను స్థానిక సంస్థకు గిఫ్ట్ డీడ్ ద్వారా అప్పగించకపోవడాన్ని ఇందుకు అనుకూలంగా చూపుతున్నారన్న అభ్యంతరాలున్నాయి. గత నిర్మాణ అనుమతుల్లో 14 శాతం ఓపెన్ స్పేస్ ఛార్జీలు, అదనపు 5 శాతం రుసుము వసూలు చేశారా, మినహాయింపు ఇచ్చారా అన్నది మున్సిపల్ రికార్డులతో తేలాల్సి ఉంది. అసలు లేఅవుట్ ఆమోద షరతుల ప్రకారం ప్రజావసర స్థలానికి ఉన్న హోదానే ఈ వివాదంలో కీలకం.
ఇంజినీర్ ప్లాన్‌కు ఆమోదం.. ఆపై షోకాజ్!
సీనియర్ స్ట్రక్చరల్ ఇంజినీర్ రూపొందించిన ప్లాన్‌కు తొలుత నిర్మాణ అనుమతి లభించింది. పనులు ప్రారంభమైన తరువాత ఉన్నతాధికారుల పరిశీలనలో కీలక లోపాలు బయటపడినట్లు మున్సిపల్ అభ్యంతరాలు సూచిస్తున్నాయి. ఒక అధికారి నిర్మాణ స్థలంలోని కొంత భాగం ఆమోదిత లేఅవుట్ ఓపెన్ స్పేస్‌లో ఉన్నట్లు పేర్కొనగా, మరో అధికారి కామన్ సైట్‌కు ఆనుకుని ఉన్నట్లు నమోదు చేశారు. మాస్టర్‌ప్లాన్‌లో 18 మీటర్ల రోడ్డు విస్తరణ ప్రతిపాదన ఉన్నప్పటికీ అవసరమైన స్థలం వదలకపోవడంపైనా అభ్యంతరాలు వ్యక్తమయ్యాయి. ఈ నేపథ్యంలో షోకాజ్ నోటీసులు జారీ చేసి, సెక్షన్ 450 కింద ప్లాన్ రద్దుకు చర్యలు ప్రతిపాదించినట్లు సమాచారం. సంబంధిత అధికారిక ఉత్తర్వుల పూర్తి వివరాలు నిర్ధారణ కావాల్సి ఉంది.
హైకోర్టులో పిటిషన్ ఉపసంహరణ.. ఇంజినీర్‌పై చర్యలకు మార్గం!
మున్సిపల్ అధికారుల చర్యలను సవాలు చేస్తూ సంబంధిత వ్యక్తులు ఆంధ్రప్రదేశ్ హైకోర్టును ఆశ్రయించారు. మధ్యంతర ఉత్తర్వులు పొందారు. ఈ వ్యవధిలో వివాదాస్పద భవన నిర్మాణం పూర్తయినట్లు సమాచారం. చివరకు పిటిషనర్లు వ్యాజ్యాన్ని ఉపసంహరించుకోవడంతో హైకోర్టు కేసును ముగించింది. దీంతో మధ్యంతర ఉత్తర్వుల అడ్డంకి తొలగి, మున్సిపల్ అధికారులు చట్టప్రకారం తదుపరి చర్యలు చేపట్టేందుకు మార్గం సుగమమైంది. ముఖ్యంగా నిర్మాణ ప్లాన్ రూపొందించిన సీనియర్ స్ట్రక్చరల్ ఇంజినీర్ వృత్తిపరమైన బాధ్యతను నిర్ధారించే అంశం తెరపైకి వచ్చింది. ఆమోదిత లేఅవుట్‌లోని ప్రజావసర స్థలం, మాస్టర్‌ప్లాన్ రోడ్డు వివరాలు తెలిసి కూడా ఉద్దేశపూర్వకంగా విస్మరించినా, కనీస పరిశీలన లేకుండా తప్పుడు వివరాలతో ప్లాన్ సమర్పించినా అది తీవ్రమైన వృత్తిపరమైన ఉల్లంఘనగా పరిగణించాల్సి ఉంటుందని ఉన్నతాధికారుల వర్గాలు పేర్కొంటున్నాయి. ప్రభుత్వ ఆదాయానికి, ప్రజల ఆస్తికి నష్టం కలిగించేలా వ్యవహరించినట్లు నిర్ధారణ అయితే వర్తించే భవన నిర్మాణ నిబంధనలు, లైసెన్స్ షరతుల ప్రకారం చర్యలు తప్పవని స్పష్టం చేస్తున్నాయి. ఇందుకు సంబంధించిన చట్టపరమైన సెక్షన్లు, శాశ్వత అనర్హత విధించే అవకాశాలను అధికారులు పరిశీలిస్తున్నట్లు సమాచారం.
ఇంజినీర్ లైసెన్స్‌పై కఠిన చర్యలు?
ఈ వ్యవహారంలో నిర్మాణ ప్లాన్ రూపొందించిన సీనియర్ ఇంజినీర్ పాత్రపై ప్రత్యేక పరిశీలన అవసరమన్న అభిప్రాయం వ్యక్తమవుతోంది. ప్రజావసర స్థలానికి సంబంధించిన వాస్తవాలను విస్మరించి ప్లాన్ సమర్పించినట్లు నిర్ధారణ అయితే ఆయన వృత్తిపరమైన బాధ్యతను తేల్చాల్సి ఉంటుంది. లైసెన్స్ సస్పెన్షన్, రద్దు, భవిష్యత్తులో నిర్మాణ ప్లాన్లు సమర్పించకుండా అనర్హత విధించే అవకాశాలపై వర్తించే చట్టాలు, నిబంధనలను పరిశీలించాల్సి ఉంది. శాశ్వత అనర్హత విధించేందుకు చట్టపరమైన అవకాశం ఉందా, సంబంధిత అధికారం ఎవరికి ఉందన్న అంశాలు ఇంకా నిర్ధారణ కావాల్సి ఉన్నాయి.
కోట్లాది రూపాయల ప్రజావసర స్థలంపై నిర్మాణానికి అనుమతి ఎలా వచ్చింది? ప్లాన్‌ను ధ్రువీకరించిన ఇంజినీర్‌తోపాటు ఆమోదించిన అధికారుల బాధ్యత ఎంత? షోకాజ్ నోటీసుల తరువాత తీసుకున్న చర్యలేమిటి? హైకోర్టు వ్యాజ్యం ముగిసిన తరువాత మున్సిపల్ యంత్రాంగం ఏం చేసింది? ఈ అంశాలకు సంబంధించిన అధికారిక రికార్డులు, వర్తించే చట్టాలు, బాధ్యులపై చర్యల అవకాశాలను లోతుగా పరిశీలించే ప్రయత్నంలో ‘సూర్య’ ఉంది.
