ఇంద్రకీలాద్రిపై భక్తులకు ఇబ్బందులు లేకుండా ఏర్పాట్లు: ఎంపీ కేశినేని చిన్ని

ఇంద్రకీలాద్రి, మేజర్ న్యూస్: దసరా శరన్నవరాత్రి ఉత్సవాల సందర్భంగా ఇంద్రకీలాద్రిపై భక్తులకు ఎలాంటి ఇబ్బందులు కలగకుండా పటిష్ట ఏర్పాట్లు చేపట్టినట్లు విజయవాడ ఎంపీ కేశినేని శివనాథ్ (చిన్ని) తెలిపారు. శుక్రవారం కుటుంబ సభ్యులతో కలిసి మూలా నక్షత్రం సందర్భంగా సరస్వతీదేవి అలంకారంలో దర్శనమిస్తున్న శ్రీ కనకదుర్గమ్మను దర్శించుకుని ప్రత్యేక పూజలు నిర్వహించారు. అమ్మవారి ఆశీస్సులతో ప్రజలందరికీ సుఖసంతోషాలు, ఆయురారోగ్యాలు, విద్యావిజ్ఞానం కలగాలని ఆకాంక్షించారు. దర్శనం అనంతరం ఎంపీ మాట్లాడుతూ ఉత్సవాల నిర్వహణలో చేపట్టిన ఏర్పాట్లు మంచి ఫలితాలను ఇస్తున్నాయని, భక్తులకు ఏదైనా సమస్య ఎదురైతే గుర్తించి త్వరితగతిన పరిష్కరించేందుకు ఆధునిక సాంకేతిక పరిజ్ఞానాన్ని వినియోగిస్తున్నామని పేర్కొన్నారు. భక్తుల రద్దీని నిరంతరం పర్యవేక్షిస్తూ, సమస్యలు తలెత్తినప్పుడు వేగంగా స్పందించే వ్యవస్థ అందుబాటులో ఉందన్నారు. వివిధ శాఖలు సమన్వయంతో పనిచేస్తూ రద్దీ నియంత్రణ, భద్రత, క్యూలైన్ల నిర్వహణపై నిరంతర పర్యవేక్షణ చేపడుతున్నాయని తెలిపారు. భక్తులకు సౌకర్యవంతమైన దర్శనం కల్పించడంతోపాటు, వారి సంతృప్తికి అత్యంత ప్రాధాన్యమిస్తూ ఉత్సవాల నిర్వహణ కొనసాగుతోందని ఎంపీ కేశినేని శివనాథ్ వెల్లడించారు. మూలా నక్షత్రం సందర్భంగా సరస్వతీదేవి అలంకారంలో ఉన్న అమ్మవారిని దర్శించుకునేందుకు భక్తులు పెద్ద సంఖ్యలో తరలిరావడంతో ఇంద్రకీలాద్రి పరిసరాలు భక్తజన సందోహంతో సందడిగా మారాయి.