గ్రామీణ రహదారుల అభివృద్ధికి పెద్దపీట : పెనమలూరు ఎమ్మెల్యే బోడే ప్రసాద్

రూ.6 కోట్లతో నిర్మించిన రహదారి ప్రారంభం

ఉయ్యూరు, మేజర్ న్యూస్ : ఉయ్యూరు మండలం ఆకునూరు, కడవకొల్లు గ్రామాల పరిధిలో రూ.6 కోట్లతో నిర్మించిన నూతన రహదారిని పెనమలూరు ఎమ్మెల్యే బోడే ప్రసాద్, మాజీ ఎమ్మెల్సీ వై.వి.బి. రాజేంద్రప్రసాద్ శుక్రవారం ప్రారంభించారు. అదేవిధంగా రూ.10 లక్షల నిధులతో చేపట్టనున్న డ్రైనేజీ పనులకు ఎమ్మెల్యే శంకుస్థాపన చేశారు. ఈ సందర్భంగా బోడే ప్రసాద్ మాట్లాడుతూ గ్రామీణ ప్రాంతాల అభివృద్ధికి నాణ్యమైన రహదారులు, మెరుగైన రవాణా సదుపాయాలు ఎంతో కీలకమన్నారు. ఆధునిక సాంకేతిక పరిజ్ఞానంతో ప్రత్యేక తారు మిశ్రమాన్ని ఉపయోగించి రహదారిని నిర్మించినట్లు తెలిపారు. ఈ మార్గం ద్వారా కుందేరు, ఆకునూరు, గండిగుంట, మూర్తిరాజుగూడెం గ్రామాల ప్రజలకు రవాణా సదుపాయాలు మెరుగుపడతాయని పేర్కొన్నారు. మూర్తిరాజుగూడెం–కుందేరు, కాటూరు–మానికొండ, కుందేరు–కందంపాడు, ముదునూరు–దూసరపాలెం రహదారుల పనులు కొనసాగుతున్నాయని తెలిపారు. తాడిగడప నుంచి ముదునూరు వరకు రహదారి అభివృద్ధితో పాటు ఉపాధి హామీ పథకం కింద గతంలో రూ.26 కోట్ల పనులు చేపట్టగా, తాజాగా మరో రూ.10 కోట్ల పనులకు నిధులు మంజూరయ్యాయని వివరించారు. గ్రామాల్లో తాగునీరు, డ్రైనేజీ, వీధి దీపాలు, పారిశుధ్యం, రహదారుల అభివృద్ధికి ప్రాధాన్యమిస్తున్నామని, అర్హులైన పేదలకు పింఛన్లు అందిస్తూ సంక్షేమ పథకాలను కొనసాగిస్తున్నామని చెప్పారు. గ్రామీణ రహదారులపై అధిక లోడుతో ప్రయాణించే లారీలపై అధికారులు చర్యలు తీసుకోవాలని సూచించినట్లు తెలిపారు. ఈ కార్యక్రమంలో కూటమి నాయకులు, కార్యకర్తలు, అధికారులు పాల్గొన్నారు.

✍️ప్రేమ్ రాజ్, ఉయ్యూరు, కృష్ణా జిల్లా