గడువు లోపు రైతులు ఈ కీవైసీ పూర్తి చేసుకోవాలి.

కుందుర్పి: ఖరీఫ్‌ 2026లో పంటలు సాగుచేసిన రైతులు ఈ నెల 15వ తేదీలోపు ఈ-కేవైసీ ప్రక్రియను పూర్తి చేసుకోవాలని కుందుర్పి మండల వ్యవసాయ అధికారి విజయకుమార్ బత్తిని, మండల వ్యవసాయ విస్తరణ అధికారి కులశేఖర్ రెడ్డి సూచించారు. ప్రభుత్వ ఆదేశాల మేరకు పంటల నమోదు చేయించుకున్న రైతులందరూ ఈ-కేవైసీ పూర్తి చేసుకోవడం తప్పనిసరి అని వారు తెలిపారు. మండలంలోని రైతులు ఈ ఖరీఫ్‌ సీజన్‌లో వేరుశెనగ, కంది, ఆముదం, పత్తి తదితర వ్యవసాయ పంటలతో పాటు మామిడి, చీనీ, దానిమ్మ, టమోటా వంటి వివిధ ఉద్యాన పంటలను సాగుచేశారు. ఆయా పంటలకు సంబంధించిన వివరాలను రైతులు తమ గ్రామాల్లోని రైతు సేవా కేంద్రాల్లో ఇప్పటికే నమోదు చేయించుకున్నారు. అయితే, పంటల నమోదు ప్రక్రియ పూర్తయినప్పటికీ, సంబంధిత రైతులు ఈ-కేవైసీ పూర్తి చేయాల్సి ఉందని అధికారులు స్పష్టం చేశారు. ప్రభుత్వం అమలు చేస్తున్న పంటల బీమా, పంట నష్టపరిహారం వంటి ప్రయోజనాలు అర్హులైన రైతులకు అందించేందుకు ఈ-కేవైసీని తప్పనిసరి చేసినట్లు వెల్లడించారు. ప్రకృతి వైపరీత్యాలు, ఇతర కారణాల వల్ల పంటలకు నష్టం వాటిల్లినప్పుడు ప్రభుత్వ నిబంధనల ప్రకారం పరిహారం పొందేందుకు పంటల నమోదు వివరాలతో పాటు ఈ-కేవైసీ ప్రక్రియ కూడా కీలకమని పేర్కొన్నారు. అందువల్ల రైతులు చివరి తేదీ వరకు వేచి చూడకుండా వీలైనంత త్వరగా ఈ ప్రక్రియను పూర్తి చేసుకోవాలని సూచించారు. రైతులు తమ గ్రామాల్లోని రైతు సేవా కేంద్రాలను సంప్రదించి, అవసరమైన వివరాలు సమర్పించి ఈ-కేవైసీ పూర్తి చేసుకోవాలని అధికారులు కోరారు. గడువులోపు ఈ ప్రక్రియను పూర్తి చేయడం ద్వారా ప్రభుత్వ పథకాల ప్రయోజనాలు పొందడంలో ఎదురయ్యే ఇబ్బందులను నివారించుకోవచ్చని తెలిపారు. మండలంలోని వ్యవసాయ, ఉద్యాన పంటలు సాగుచేసిన రైతులందరూ ఈ విషయాన్ని గమనించి, ఈ నెల 15వ తేదీలోపు ఈ-కేవైసీ పూర్తి చేసుకోవాలని మండల వ్యవసాయ అధికారులు విజ్ఞప్తి చేశారు.

కళ్యాణదుర్గం టౌన్ రిపోర్టర్ :-రంగస్వామి.