ఎన్నికల విధులపై సిబ్బందికి శిక్షణ
పోలింగ్‌ నిర్వహణపై పీవో, ఏపీవోలకు అవగాహన
మెలియాపుట్టి. అక్టోబర్ 26. మేజర్ న్యూస్ ....
మెలియాపుట్టి మండలం చాపర జిల్లా పరిషత్‌ ఉన్నత పాఠశాలలో సోమవారం స్థానిక సంస్థల ఎన్నికల నిర్వహణకు సంబంధించి పీవో, ఏపీవోలకు శిక్షణ కార్యక్రమం నిర్వహించారు. ఎంపీడీవో పి.నరసింహ ప్రసాద్, తహసీల్దార్‌ టి.రాము ఆధ్వర్యంలో జరిగిన ఈ కార్యక్రమంలో ఎన్నికల విధివిధానాలను వివరించారు.పోలింగ్‌ ప్రక్రియలో అనుసరించాల్సిన నిబంధనలు, బ్యాలెట్ పత్రాలు, బ్యాలెట్ బాక్సుల వినియోగం, ఓటర్ల గుర్తింపు తదితర అంశాలపై సిబ్బందికి అవగాహన కల్పించారు. ఎన్నికల సమయంలో తీసుకోవాల్సిన జాగ్రత్తలు, పోలింగ్‌ కేంద్రాల్లో నిర్వహించాల్సిన విధుల గురించి వివరించారు. విధుల నిర్వహణలో ఎలాంటి పొరపాట్లకు తావివ్వకుండా ఎన్నికల నియమావళిని తప్పనిసరిగా పాటించాలని సూచించారు.
ఓటింగ్‌ ప్రక్రియ సజావుగా సాగేందుకు అధికారులు సమన్వయంతో పనిచేయాలని పేర్కొన్నారు. పోలింగ్‌ కేంద్రాల్లో శాంతియుత వాతావరణాన్ని కొనసాగిస్తూ, ఓటర్లకు ఎలాంటి ఇబ్బందులు కలగకుండా చూడాలన్నారు. ఎన్నికల నిర్వహణలో పారదర్శకతకు ప్రాధాన్యమిస్తూ, అప్పగించిన బాధ్యతలను సమర్థంగా నిర్వర్తించాలని సూచించారు.
శిక్షణ కార్యక్రమంలో ఎన్నికల విధులకు నియమితులైన అధికారులు, సిబ్బంది పాల్గొన్నారు.
