బీసీలకు 34% రిజర్వేషన్లపై వెనక్కి తగ్గేదే లేదు: ఎమ్మెల్యే కందికుంట వెంకటప్రసాద్ * బీసీల సామాజిక న్యాయం, సాధికారతే కూటమి ప్రభుత్వ లక్ష్యం * రిజర్వేషన్లు దక్కే వరకు న్యాయపోరాటం – సుప్రీంకోర్టును ఆశ్రయిస్తాం: కదిరి ఎమ్మెల్యే కందికుంట

కదిరి ;స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పించడమే తెలుగుదేశం పార్టీ, కూటమి ప్రభుత్వాల ముఖ్య ఉద్దేశమని కదిరి నియోజకవర్గ శాసనసభ్యులు కందికుంట వెంకటప్రసాద్ పేర్కొన్నారు. బీసీల రాజకీయ ప్రాతినిధ్యం, సామాజిక న్యాయం విషయంలో ఎంతవరకైనా పోరాడతామని స్పష్టం చేశారు.

కదిరిలో నిర్వహించిన విలేకరుల సమావేశంలో ఎమ్మెల్యే మాట్లాడుతూ... ముఖ్యమంత్రి నారా చంద్రబాబు నాయుడు నాయకత్వంలో స్థానిక సంస్థల్లో బీసీలకు 34 శాతం రిజర్వేషన్ల కల్పనకు జీవోలు జారీ చేస్తే, వైసీపీ నేతలు కోర్టుకెళ్లి అడ్డుకోవడం దారుణమన్నారు. గత వైసీపీ పాలనలో న్యాయపరమైన రక్షణ కల్పించకపోవడం వల్లే దాదాపు 16,800 మంది బీసీ ప్రజాప్రతినిధులు తమ పదవులను కోల్పోయారని విమర్శించారు.

హైకోర్టు తీర్పును గౌరవిస్తూనే, బీసీలకు న్యాయం జరిగేలా అందుబాటులో ఉన్న అన్ని అవకాశాలను ఉపయోగించుకుని సుప్రీంకోర్టును ఆశ్రయిస్తామని తెలిపారు. 1987లో 20 శాతం, 1995లో 34 శాతం రిజర్వేషన్లు ఇచ్చి బీసీలను రాజకీయంగా ఆదుకున్న చరిత్ర టీడీపీదని గుర్తుచేశారు. బీసీలను కేవలం ఓటు బ్యాంకుగా చూడకుండా పాలనలో భాగస్వాములను చేయడమే తమ ధ్యేయమని పునరుద్ఘాటించారు.

ఈ సమావేశంలో కదిరి నియోజకవర్గ పరిశీలకులు చెంచయ్య నాయుడు, పట్టణ అధ్యక్షులు డైమండ్ ఇర్ఫాన్, టీడీపి నాయకులు ఖాసీం వలి, పిచ్చిలి శంకర తదితరులు పాల్గొన్నారు.