అగ్ని ప్రమాద బాధిత కుటుంబానికి మానవతా చేయూత

వీరవల్లి గ్రామంలో అగ్ని ప్రమాదంలో నివాసాన్ని పూర్తిగా కోల్పోయిన బాధిత కుటుంబానికి మానవతా స్వచ్ఛంద సేవా సంస్థ గన్నవరం శాఖ అండగా నిలిచింది. సంస్థ ఆధ్వర్యంలో రూ.15 వేల విలువైన ఇంటి సామగ్రితో పాటు దాతలు అందించిన సుమారు రూ.20 వేల విలువైన సామగ్రి, దుస్తులు తదితరాలను కలిపి మొత్తం రూ.35 వేల విలువైన వస్తువులను బాధిత కుటుంబానికి అందజేశారు. ఈ కార్యక్రమానికి మానవతా గన్నవరం శాఖ చైర్మన్ మడుపల్లి బాలకృష్ణమూర్తి అధ్యక్షత వహించారు. అధ్యక్షుడు కర్రా వరప్రసాద్, కోచైర్మన్ వీసం ప్రసాదరావు, గౌరవ డైరెక్టర్ కలపాల శ్రీనివాసరావు, కమిటీ సభ్యులు ముక్కామల సుబ్బారావు, యర్కా రెడ్డి, సంజీవరెడ్డి, సభ్యులు నందిగం రవికుమార్, కలపాల రాజబాబు, వీరవల్లి సొసైటీ అధ్యక్షుడు కలపాల నానిబాబు తదితరులు పాల్గొన్నారు. అగ్ని ప్రమాదంలో సర్వం కోల్పోయిన తమ కుటుంబానికి అండగా నిలిచి నిత్యావసర వస్తువులు అందించిన మానవతా సంస్థ ప్రతినిధులకు, దాతలకు బాధిత కుటుంబ సభ్యులు కృతజ్ఞతలు తెలిపారు.