ప్రజల సంక్షేమమే ప్రభుత్వ ప్రధాన లక్ష్యం మంత్రి దామోదర్ రాజా నరసింహ

ఘనంగా ప్రజా పాలన దినోత్సవం
ప్రజల సంక్షేమమే ప్రభుత్వ ప్రధాన లక్ష్యం
అర్హులందరికీ సంక్షేమ పథకాల ప్రయోజనాలు అందాలి: మంత్రి దామోదర్ రాజనర్సింహ
దివ్యాంగులకు రూ.13.10 లక్షల విలువైన సహాయ పరికరాల పంపిణీ

సంగారెడ్డి,  : ప్రజల సంక్షేమం, పారదర్శక పాలన, జవాబుదారీతనానికి ప్రాధాన్యతనిస్తూ ప్రజా పాలన దినోత్సవాన్ని సంగారెడ్డి జిల్లాలో గురువారం ఘనంగా నిర్వహించారు. సంగారెడ్డి కలెక్టరేట్ ప్రాంగణంలో ఏర్పాటు చేసిన ప్రజా పాలన దినోత్సవ కార్యక్రమానికి తెలంగాణ రాష్ట్ర వైద్య, ఆరోగ్య, కుటుంబ సంక్షేమ శాఖ మంత్రి దామోదర్ రాజనర్సింహ ముఖ్య అతిథిగా హాజరయ్యారు.
ఈ సందర్భంగా మంత్రి జాతీయ జెండాను ఆవిష్కరించి వందన సమర్పణ చేశారు. అనంతరం పోలీసుల నుంచి గౌరవ వందనం స్వీకరించారు. కార్యక్రమంలో జిల్లా కలెక్టర్ ప్రతీక్ జైన్, జిల్లా ఎస్పీ పరితోష్ పంకజ్ తదితరులు పాల్గొన్నారు.

ప్రజల సంక్షేమమే ప్రభుత్వ లక్ష్యం...

ఈ సందర్భంగా మంత్రి దామోదర్ రాజనర్సింహ మాట్లాడుతూ ప్రజల సంక్షేమమే ప్రభుత్వ ప్రధాన లక్ష్యమని పేర్కొన్నారు. ప్రజలకు ప్రభుత్వ సేవలను మరింత పారదర్శకంగా, జవాబుదారీతనంతో అందించేందుకు ప్రజా పాలనకు ప్రభుత్వం అత్యంత ప్రాధాన్యత ఇస్తోందన్నారు.ప్రజల వద్దకే పాలనను తీసుకెళ్లి, వారి సమస్యలను నేరుగా తెలుసుకుని, వాటికి సత్వర పరిష్కారం చూపే విధంగా అధికారులు సమన్వయంతో పనిచేయాలని మంత్రి సూచించారు. ప్రభుత్వం అమలు చేస్తున్న సంక్షేమ, అభివృద్ధి కార్యక్రమాల ప్రయోజనాలు అర్హులైన ప్రతి ఒక్కరికీ అందేలా అధికారులు ప్రత్యేక శ్రద్ధ వహించాలన్నారు.ప్రజలకు ఎల్లప్పుడూ అందుబాటులో ఉంటూ వారి సమస్యలను నేరుగా తెలుసుకోవాలని, సమస్యల పరిష్కారంలో ఎలాంటి జాప్యం లేకుండా తక్షణ చర్యలు చేపట్టాలని అధికారులను ఆదేశించారు. ప్రజల అవసరాలను గుర్తించి, వాటికి అనుగుణంగా అభివృద్ధి కార్యక్రమాలను రూపొందించి సమర్థవంతంగా అమలు చేయాల్సిన బాధ్యత అధికారులపై ఉందన్నారు.
అలాగే ప్రభుత్వ పథకాలపై ప్రజలకు విస్తృతంగా అవగాహన కల్పించి, అర్హత కలిగిన ప్రతి ఒక్కరూ ఆయా పథకాల ప్రయోజనాలను పొందేలా చూడాలని అధికారులకు సూచించారు.

ఆకట్టుకున్న చిన్నారుల సాంస్కృతిక ప్రదర్శనలు...

ప్రజా పాలన దినోత్సవాన్ని పురస్కరించుకుని చిన్నారులు ప్రదర్శించిన సాంస్కృతిక కార్యక్రమాలు ప్రత్యేక ఆకర్షణగా నిలిచాయి. చిన్నారుల ప్రదర్శనలు కార్యక్రమానికి వచ్చిన వారిని ఆకట్టుకున్నాయి.

అమరవీరులకు ఘన నివాళి...

అంతకుముందు మంత్రి దామోదర్ రాజనర్సింహ తెలంగాణ అమరవీరుల స్థూపం వద్ద పుష్పాంజలి ఘటించి అమరవీరులకు ఘనంగా నివాళులర్పించారు. తెలంగాణ రాష్ట్ర సాధన కోసం ప్రాణత్యాగం చేసిన అమరవీరుల త్యాగాలను ఈ సందర్భంగా స్మరించుకున్నారు.

దివ్యాంగులకు రూ.13.10 లక్షల విలువైన సహాయ పరికరాలు...

ప్రజా పాలన దినోత్సవంలో భాగంగా మహిళా, శిశు, దివ్యాంగులు మరియు వయోవృద్ధుల సంక్షేమ శాఖ ఆధ్వర్యంలో దివ్యాంగులకు ఉచిత సహాయ పరికరాల పంపిణీ కార్యక్రమాన్ని నిర్వహించారు.తెలంగాణ దివ్యాంగుల కోఆపరేటివ్ కార్పొరేషన్, హైదరాబాద్ ఆధ్వర్యంలో, గ్లోబల్ గ్రీన్ కంపెనీ ప్రైవేట్ లిమిటెడ్, సంగారెడ్డి వారి సహకారంతో సుమారు రూ.13.10 లక్షల విలువైన బ్యాటరీతో నడిచే ట్రైసైకిళ్లు, బ్యాటరీ ఆటోను దివ్యాంగులకు పంపిణీ చేశారు.
ఈ కార్యక్రమంలో మొత్తం 21 బ్యాటరీతో నడిచే ట్రైసైకిల్ యూనిట్లు, ఒక బ్యాటరీ ఆటోను దివ్యాంగులకు అందజేశారు.

స్వయం ఉపాధికి చేయూత...

దివ్యాంగులు స్వయం ఉపాధి పొందుతూ ఆర్థికంగా స్వావలంబన సాధించేందుకు సహాయ పరికరాల పంపిణీ దోహదపడుతుందని అధికారులు తెలిపారు. ప్రభుత్వం, వివిధ సంస్థల సహకారంతో అర్హులైన దివ్యాంగులకు అవసరమైన సహాయాన్ని అందించేందుకు చర్యలు కొనసాగుతున్నాయని పేర్కొన్నారు.ఈ కార్యక్రమంలో అదనపు కలెక్టర్ (స్థానిక సంస్థలు) పాండు, అదనపు కలెక్టర్ (రెవెన్యూ) సంగీత, జిల్లా సంక్షేమ శాఖ అధికారి లలిత కుమారితో పాటు వివిధ శాఖల అధికారులు, సిబ్బంది, ప్రజా ప్రతినిధులు, దివ్యాంగులు, వారి కుటుంబ సభ్యులు తదితరులు పాల్గొన్నారు.