అక్టోబర్ 1 నుంచి కొత్త పెన్షన్ల పంపిణీ: మంత్రి సీతక్క ప్రకటన

సూర్యా న్యూస్ డెస్క్
రాష్ట్రంలో అర్హులైన వారికి అక్టోబర్ 1 నుంచి కొత్త పింఛన్లు పంపిణీ చేయనున్నట్లు రాష్ట్ర మంత్రి సీతక్క శాసనమండలిలో వెల్లడించారు. సోషల్ ఆడిట్ ద్వారా అనర్హులు, డబుల్ పింఛన్లు మరియు మృతి చెందిన వారి పేర్లను తొలగిస్తామని తెలిపారు. అలాగే తలసేమియా బాధితులకు కూడా పింఛన్లు అందించేందుకు దరఖాస్తులు స్వీకరిస్తున్నట్లు ఆమె పేర్కొన్నారు.

రాష్ట్రంలో కొత్త పింఛన్ల మంజూరుకు సంబంధించి ప్రభుత్వం నుంచి కీలక ప్రకటన వెలువడింది. అర్హులైన లబ్ధిదారులకు అక్టోబర్ 1వ తేదీ నుంచి నూతన పింఛన్లను పంపిణీ చేయనున్నట్లు రాష్ట్ర పంచాయతీరాజ్, గ్రామీణాభివృద్ధి శాఖ మంత్రి ధనసరి సీతక్క శాసనమండలి వేదికగా ప్రకటించారు. శాసనమండలి సమావేశంలో సభ్యులు అడిగిన ప్రశ్నలకు సమాధానమిస్తూ ఆమె ప్రభుత్వ విధానాన్ని స్పష్టం చేశారు.

ఇక, దివ్యాంగుల పింఛన్లకు సంబంధించి సదరం సర్టిఫికెట్ల రెన్యూవల్ చేసుకోని కారణంగా కొందరికి సాంకేతిక ఇబ్బందులు తలెత్తి పింఛన్లు నిలిచిపోయినట్లు మంత్రి వివరించారు. అర్హత ఉన్నప్పటికీ సర్టిఫికెట్ల గడువు ముగియడం లేదా రెన్యూవల్ ప్రక్రియ పూర్తికాకపోవడంతో ఈ పరిస్థితి ఏర్పడిందని తెలిపారు. సంబంధిత ధృవపత్రాలను పునరుద్ధరించుకున్న వెంటనే వారికి నిలిచిపోయిన పింఛన్లు కూడా అందుతాయని భరోసా కల్పించారు.

మరోవైపు, పింఛన్ల పంపిణీలో పారదర్శకతను తీసుకువచ్చేందుకు ప్రభుత్వం కఠిన చర్యలు చేపడుతున్నట్లు సీతక్క వెల్లడించారు. లబ్ధిదారులు మృతి చెందినప్పటికీ కొందరు ఇంకా పింఛన్లు తీసుకుంటున్నట్లు తమ దృష్టికి వచ్చిందని చెప్పారు. ఇలాంటి వాటితో పాటు డబుల్ పింఛన్లు, ఇతర అనర్హత జాబితాలో ఉన్న వాటిని ఏరివేసేందుకు సమగ్రమైన సోషల్ ఆడిట్ నిర్వహిస్తామని స్పష్టం చేశారు. ఈ తనిఖీల ద్వారా అనర్హుల పేర్లను తొలగించి, ఆ వెసులుబాటును నిజమైన అర్హులైన పేదలకు కల్పిస్తామని తెలిపారు.

సమాజంలో ప్రత్యేక ఆ సంరక్షణ అవసరమైన వర్గాలకు ప్రభుత్వం అండగా ఉంటుందని మంత్రి తెలిపారు. ఇందులో భాగంగానే తలసేమియా వ్యాధితో బాధపడుతున్న బాధితులకు కూడా పింఛన్లు మంజూరు చేస్తున్నట్లు ప్రకటించారు. ఈ ప్రత్యేక కేటగిరీ కింద అవసరమైన దరఖాస్తులను ఇప్పటికే స్వీకరిస్తున్నామని, అర్హులైన ప్రతి ఒక్కరికీ త్వరలోనే ఈ సాయం అందుతుందని మంత్రి సీతక్క మండలిలో వివరించారు.