ఐదు రోజుల పని వారాన్ని డిమాండ్ చేస్తూ నాగర్ కర్నూల్లో బ్యాంకు ఉద్యోగుల సమ్మె
నాగర్ కర్నూల్: ఐదు రోజుల పని వారాన్ని అమల్లోకి తీసుకురావాలని డిమాండ్ చేస్తూ యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) పిలుపు మేరకు దేశవ్యాప్తంగా చేపట్టిన జాతీయ సమ్మెలో భాగంగా నాగర్ కర్నూల్లో బ్యాంకు ఉద్యోగులు పెద్దఎత్తున నిరసన తెలిపారు. స్టేట్ బ్యాంక్ ఆఫ్ ఇండియా (SBI) ఆధ్వర్యంలో నిర్వహించిన ఈ ర్యాలీ, ధర్నా కార్యక్రమాల్లో ఉద్యోగులు, అధికారులు పెద్ద సంఖ్యలో పాల్గొన్నారు.
ఈ సందర్భంగా యుఎఫ్ బియు నేతలు మాట్లాడుతూ, 'పని-వ్యక్తిగత జీవన సమతుల్యత' (Work-Life Balance) సాధించేందుకు మరియు ఉద్యోగుల సంక్షేమంతో పాటు ప్రజలకు మెరుగైన సేవలందించేందుకు ఐదు రోజుల పని విధానం ఎంతగానో అవసరమని పేర్కొన్నారు. ఇతర ఆర్థిక సంస్థలతో సమానంగా బ్యాంకుల్లోనూ ఈ విధానాన్ని వర్తింపజేయాలని, అలాగే పిఎల్ఐ (PLI) పథకాన్ని వెంటనే ఉపసంహరించుకోవాలని వారు డిమాండ్ చేశారు. కేంద్ర ప్రభుత్వం స్పందించి పెండింగ్ సమస్యలను తక్షణమే పరిష్కరించాలని కోరారు.
ఎస్బీఐ ఉద్యోగులు చేపట్టిన ఈ సమ్మెకు యూనియన్ బ్యాంక్ ఆఫ్ ఇండియా, తెలంగాణ గ్రామీణ బ్యాంక్ (TGB) ఉద్యోగులు పూర్తి మద్దతు తెలిపారు. సమ్మె కారణంగా జిల్లావ్యాప్తంగా సాధారణ బ్యాంకింగ్ లావాదేవీలకు తీవ్ర అంతరాయం ఏర్పడింది. ఈ నిరసన కార్యక్రమంలో UFBU ప్రతినిధులు శ్రీకాంత్ రెడ్డి, శ్రీనివాసులు, పృథ్వీ, అభి, కిషోర్, లక్ష్మణ్ తదితరులు పాల్గొన్నారు.
