ఎస్పీ రాం కుమార్ దంపతులకు ఘన సన్మానం

కష్టపడి చదివి ఉన్నత స్థాయికి ఎదగాలి -ఎస్పీ రాం కుమార్

నరసింహులగూడెంలో ఉద్యోగ సాధకులకు సత్కారం

యువత లక్ష్యంతో కష్టపడి చదివి ఉన్నత స్థాయికి ఎదగాలి

మునగాల, మేజర్ న్యూస్: సూర్యాపేట జిల్లా మునగాల మండలం నరసింహులగూడెం గ్రామానికి చెందిన కామల్ల రాం కుమార్, ప్రశాంతి దంపతులను గ్రామ సర్పంచ్ కుంచెం ఇందిరా నరసయ్య ఆధ్వర్యంలో వివేకానంద యూత్ సభ్యులు ఘనంగా సన్మానించారు.

గత ఆగస్టు 15న రాష్ట్రపతి సేవా పతకం అవార్డు అందుకోవడంతో పాటు ఎస్పీగా పదోన్నతి పొందిన రాం కుమార్ ను గ్రామస్థులు ఘనంగా సత్కరించి అభినందనలు తెలిపారు.

ఈ సందర్భంగా రాం కుమార్ మాట్లాడుతూ..1991లో తొలిసారిగా ఎస్సైగా ఉద్యోగం సాధించానని తెలిపారు. గ్రామానికి చెందిన విద్యాసాగర్ రెడ్డి, ఆదిరెడ్డిలను స్ఫూర్తిగా తీసుకుని, వారి ఆదర్శాలతో ముందుకు సాగుతూ నేడు ఈ స్థాయికి చేరుకున్నానని పేర్కొన్నారు. గ్రామీణ ప్రాంతాల యువత పట్టుదలతో లక్ష్యాన్ని నిర్దేశించుకుని కష్టపడి చదవాలని, ఉన్నత ఉద్యోగాలు సాధించి గ్రామానికి, తల్లిదండ్రులకు మంచి పేరు తీసుకురావాలని పిలుపునిచ్చారు. కృషి, క్రమశిక్షణ, పట్టుదలతో ముందుకు సాగితే అనుకున్న లక్ష్యాలను సాధించవచ్చని యువతకు సూచించారు.

అనంతరం గ్రామంలో వివిధ ప్రభుత్వ ఉద్యోగాలు సాధించిన యువతను కూడా నిర్వాహకులు ఘనంగా సన్మానించారు. ఈ సందర్భంగా గ్రామంలో విద్యార్థులు, యువతకు స్ఫూర్తినిచ్చేలా కార్యక్రమాన్ని నిర్వహించిన వివేకానంద యూత్ సభ్యులను పలువురు అభినందించారు.

ఈ కార్యక్రమంలో గ్రామ ఉపసర్పంచ్ సీతారాములు, మాజీ సర్పంచ్ కొండారెడ్డి, సీఐ ప్రతాప లింగం, ఎస్సై సంజీవరెడ్డి, న్యాయవాది ఉయ్యాల నరసయ్య, మాజీ ఎంపీటీసీ ఆయిద్వా, జిల్లా కమిటీ సభ్యురాలు విజయలక్ష్మి, గణేష్ తో పాటు గ్రామ పెద్దలు, యువత, గ్రామ ప్రజలు అధిక సంఖ్యలో పాల్గొన్నారు.