చిత్తూరు చిన్నారి అరుదైన ఘనత.. పొడవైన సహజ జుట్టుతో బుక్ ఆఫ్ వరల్డ్ రికార్డ్స్లో బండి జియా రెడ్డి
సూర్య చిత్తూరు డెస్క్: ఆంధ్రప్రదేశ్ రాష్ట్రం చిత్తూరు పట్టణానికి చెందిన కేవలం మూడు నెలల పసికందు అరుదైన ప్రపంచ స్థాయి గుర్తింపును సాధించి అందరినీ ఆశ్చర్యపరిచింది. పుట్టుకతోనే అసాధారణమైన ఒత్తైన మరియు పొడవైన సహజ కేశ సంపద కలిగిన బండి జియా రెడ్డి అనే చిన్నారి ప్రతిష్టాత్మక బుక్ ఆఫ్ వరల్డ్ రికార్డ్స్ సంస్థ గుర్తింపును దక్కించుకుంది. మూడు నెలల పిన్న వయసులోనే ఏడు నుంచి ఎనిమిదిన్నర సెంటీమీటర్ల మేర పొడవైన సహజ జుట్టును కలిగి ఉన్నందుకుగాను ఈ రికార్డును అధికారికంగా నమోదు చేశారు.
బుక్ ఆఫ్ వరల్డ్ రికార్డ్స్ జారీ చేసిన అధికారిక ధ్రువీకరణ పత్రం ప్రకారం యంగెస్ట్ బేబీ డాక్యుమెంటెడ్ విత్ ఎక్సెప్షనల్లీ లాంగ్ నేచురల్ హెయిర్ ఎట్ త్రీ మంత్స్ ఆఫ్ ఏజ్ అనే ప్రత్యేక విభాగంలో జియా రెడ్డికి ఈ టైటిల్ లభించింది. చిన్నారి తల్లిదండ్రులు సమర్పించిన కొలతలు, వైద్య నివేదికలు, ఫొటోలు మరియు వీడియో ఆధారాలను సంస్థ పరిశీలనా కమిటీ క్షుణ్ణంగా అధ్యయనం చేసిన అనంతరం ఈ రికార్డును ధ్రువీకరించింది. సెప్టెంబర్ ఎనిమిదో తేదీన రికార్డు నంబర్ బిడబ్ల్యూఆర్/ఇండియా/2026/001271 తో అధికారిక పత్రాన్ని జారీ చేసినట్లు నిర్వాహకులు పేర్కొన్నారు.
ఈ విశిష్టమైన గుర్తింపు పట్ల చిన్నారి తల్లిదండ్రులు బండి శివ కుమార్ మరియు అలేఖ్యలు అమితానందాన్ని వ్యక్తం చేశారు. తమ కుమార్తెకు ఇంత చిన్న వయసులోనే అంతర్జాతీయ వేదికపై గుర్తింపు దక్కడం తమ కుటుంబానికే కాక చిత్తూరు జిల్లాకే గర్వకారణమని వారు సంతోషం వ్యక్తం చేశారు. భవిష్యత్తులో ఈ ప్రత్యేకతకు గ్లోబల్ స్థాయిలో మరింత గుర్తింపు తీసుకురావాలనే లక్ష్యంతో త్వరలోనే గిన్నిస్ వరల్డ్ రికార్డ్స్ కోసం కూడా దరఖాస్తు చేసుకోవడానికి సన్నాహాలు చేస్తున్నట్లు కుటుంబ సభ్యులు వెల్లడించారు. మూడు నెలలకే ప్రపంచ రికార్డుల్లోకెక్కిన బుజ్జాయి జియా రెడ్డికి బంధుమిత్రులు, స్థానికులు శుభాకాంక్షలు తెలుపుతున్నారు.
