భారత ఆరోగ్య రంగాన్ని కొనియాడిన డబ్ల్యూహెచ్ఓ అధిపతి

ఆయుష్మాన్ ఆరోగ్య మందిరాలు, ఆశా నెట్‌వర్క్‌పై ప్రశంసలు
తైమోర్-లెస్టే: భారతదేశం ఆరోగ్య సంరక్షణ రంగంలో సాధించిన పురోగతిని, ముఖ్యంగా మాతృ, శిశు ఆరోగ్యం మరియు అంటువ్యాధులు కాని వ్యాధుల (NCDs) నివారణలో సాధించిన విజయాలను ప్రపంచ ఆరోగ్య సంస్థ (WHO) డైరెక్టర్-జనరల్ డాక్టర్ టెడ్రోస్ అధనోమ్ గెబ్రియేసస్ కొనియాడారు. తైమోర్-లెస్టేలో జరుగుతున్న డబ్ల్యూహెచ్ఓ ఆగ్నేయాసియా ప్రాంతీయ కమిటీ 79వ సమావేశం (RC79) సందర్భంగా ఆయన కేంద్ర ఆరోగ్య శాఖ మంత్రి జె.పి. నడ్డాతో భేటీ అయ్యారు.

దేశవ్యాప్తంగా ఉన్న సుమారు 1,60,000 ఆయుష్మాన్ ఆరోగ్య మందిరాలు అధిక రక్తపోటు, మధుమేహం, సాధారణ క్యాన్సర్ల పరీక్షలను ప్రజలకు చేరువ చేస్తున్నాయని డబ్ల్యూహెచ్ఓ అధిపతి ప్రశంసించారు. అలాగే ఆశా (ASHA) కార్యకర్తలు గర్భధారణ నుంచి కౌమారదశ వరకు తల్లులకు, పిల్లలకు సేవలు అందిస్తూ ఆరోగ్య సంరక్షణను నేరుగా ప్రజల ఇళ్ల వద్దకే తీసుకెళ్తున్నారని కొనియాడారు. దేశంలో సంస్థాగత ప్రసవాలు 78 శాతం నుంచి 93 శాతానికి పెరగడం వల్ల మాతృ, శిశు మరణాల రేటు గణనీయంగా తగ్గిందని తెలిపారు. క్షయవ్యాధి (TB) నిర్మూలనకు భారత్ చేస్తున్న ప్రయత్నాలు, వైద్య ఉత్పత్తుల నియంత్రణ, మరియు సాంప్రదాయ వైద్యంలో భారత్ అందిస్తున్న మద్దతును ఆయన ఈ సందర్భంగా ప్రస్తావించారు.

ఈ సమావేశంలో కేంద్ర మంత్రి జె.పి. నడ్డా ప్రసంగిస్తూ, 2014 తర్వాత దేశంలో వైద్య విద్య, ఆరోగ్య మౌలిక సదుపాయాల విస్తరణ వేగవంతమైందని వివరించారు. దేశంలో వైద్య కళాశాలల సంఖ్య 387 నుంచి 858కి పెరిగిందని తెలిపారు. అలాగే ఎంబీబీఎస్ సీట్లు 51,348 నుంచి 1,42,464కు, పోస్ట్ గ్రాడ్యుయేట్ సీట్లు 31,185 నుంచి 86,287కి పెరిగాయని మంత్రి నడ్డా వెల్లడించారు.