సౌదీ చమురు కేంద్రాలపై హౌతీల దాడులను ఖండించిన భారత్

న్యూఢిల్లీ:సౌదీ అరేబియాలోని చమురు కేంద్రాలు, పౌర మౌలిక సదుపాయాలపై హౌతీ మిలిటెంట్లు జరిపిన తాజా దాడులను భారతదేశం తీవ్రంగా ఖండించింది. ఇటువంటి చర్యలు ప్రాంతీయ భద్రతను, స్థిరత్వాన్ని తీవ్రంగా దెబ్బతీస్తాయని ఆందోళన వ్యక్తం చేసింది.

సౌదీ అరేబియా సార్వభౌమ భూభాగంపై, ముఖ్యంగా పౌర మరియు ఆర్థిక కేంద్రాలను లక్ష్యంగా చేసుకుని జరిపిన ఈ దాడులను భారత్ ఖండిస్తుందని విదేశాంగ మంత్రిత్వ శాఖ (MEA) అధికారిక ప్రతినిధి రణధీర్ జైస్వాల్ తెలిపారు. ప్రాంతీయ భద్రతతో పాటు బాబ్-ఎల్-మండేబ్ జలసంధిలో స్వేచ్ఛా నౌకాయానానికి ముప్పు కలిగించేలా ఉన్న ఈ దాడులు ఏమాత్రం ఆమోదయోగ్యం కావు అని ఆయన స్పష్టం చేశారు.

ఇరాన్ మద్దతు ఉన్న హౌతీ మిలిటెంట్ గ్రూప్ యెమెన్ కేంద్రంగా ఈ దాడులకు పాల్పడింది. ఇరాన్‌పై అమెరికా తన ఆర్థిక ఆంక్షలను మరింత కఠినతరం చేస్తున్న సమయంలోనే ఈ పరిణామం చోటుచేసుకోవడం గమనార్హం. కాగా, ఈ దాడులతో పశ్చిమ ఆసియాలో ఉద్రిక్తతలు మరింత పెరుగుతాయనే ఆందోళనలు అంతర్జాతీయంగా వ్యక్తమవుతున్నాయి.