జపాన్లో రెండేళ్ల గరిష్టానికి కార్పొరేట్ సేవల ద్రవ్యోల్బణం
వడ్డీ రేట్ల పెంపు సంకేతాలు ఇచ్చేసిన బ్యాంక్ ఆఫ్ జపాన్
సూర్య బిజినెస్ డెస్క్: జపాన్ ఆర్థిక వ్యవస్థలో కార్పొరేట్ సేవల ద్రవ్యోల్బణం ఆగస్టు నెలలో ఊహించని రీతిలో వేగవంతమై రెండేళ్ల గరిష్ట స్థాయికి చేరుకుంది. సంస్థలు ఒకదానికొకటి అందించే సేవల ధరలను ప్రతిబింబించే 'సర్వీసెస్ ప్రొడ్యూసర్ ప్రైస్ ఇండెక్స్' ఆగస్టులో ఏడాది క్రితంతో పోలిస్తే 3.7 ಶాతానికి పెరిగినట్లు బ్యాంక్ ఆఫ్ జపాన్ విడుదల చేసిన అధికారిక నివేదిక వెల్లడించింది. జులై నెలలో నమోదు చేసిన 3.6 శాతం పెరుగుదల కంటే ఇది అధికం కాగా, జూన్ 2024 తర్వాత నమోదు చేసిన అత్యంత వేగవంతమైన వార్షిక వృద్ధి ఇదే కావడం గమనార్హం.
రవాణా ఛార్జీలు, ప్రకటనల వ్యయాలు మరియు ఆస్తుల లీజు అద్దెలు విపరీతంగా పెరగడం ఈ ద్రవ్యోల్బణ తీవ్రతకు ప్రధాన కారణాలుగా నిలిచాయి. కార్మికుల వేతనాలు పెరుగుతున్న కొద్దీ ఆ భారాన్ని సంస్థలు సేవల ధరల రూపంలో వినియోగదారులకు మరియు ఇతర వ్యాపార భాగస్వాములకు బదిలీ చేస్తున్నాయనడానికి ఈ గణాంకాలే ప్రత్యక్ష నిదర్శనం. నిరంతరం పెరుగుతున్న ఈ ధరల ఒత్తిడి దేశంలో విస్తృతమైన ద్రవ్యోల్బణ వాతావరణం నెలకొందని స్పష్టం చేస్తోంది.
ఇప్పటికే బ్యాంక్ ఆఫ్ జపాన్ తన కీలకమైన బెంచ్ మార్క్ వడ్డీ రేటును 31 ఏళ్ల గరిష్ట స్థాయి అయిన 1.25 శాతానికి పెంచిన సంగతి తెలిసిందే. ద్రవ్యోల్బణం తమ నిర్దేశిత లక్ష్యాన్ని దాటిపోకుండా నిరోధించేందుకు రాబోయే రోజుల్లో రుణ రేట్లను మరింత పెంచేందుకు తాము సిద్ధంగా ఉన్నామని సెంట్రల్ బ్యాంక్ గవర్నర్ స్పష్టమైన సంకేతాలు ఇచ్చారు. శ్రామిక లభ్యత తక్కువగా ఉండటం, పెరుగుతున్న వేతన వ్యయాలు సేవ రంగాన్ని ప్రభావితం చేస్తుండటంతో జపాన్ భవిష్యత్ ఆర్థిక విధానాలపై అంతర్జాతీయ పారిశ్రామిక వర్గాలు నిశితంగా దృష్టి సారించాయి.
