అంతర్జాతీయ మార్కెట్లో మళ్లీ భగ్గుమన్న ముడి చమురు ధరలు.. బ్రెంట్ క్రూడ్ జంప్

సూర్య బిజినెస్ డెస్క్: అంతర్జాతీయ మార్కెట్లో క్రూడాయిల్ ధరలు ఒక్కసారిగా దూసుకెళ్లాయి. అమెరికా అధ్యక్షుడిగా డొనాల్డ్ ట్రంప్ తీసుకున్న ఒక కీలక నిర్ణయం ప్రపంచ ఇంధన మార్కెట్లలో తీవ్ర కలకలం రేపింది. హార్ముజ్ జలసంధిని తెరిచి మధ్యప్రాచ్యంలో ఘర్షణలకు ముగింపు పలకాలంటూ ఇరాన్ ప్రతిపాదించిన శాంతి ఒప్పందాన్ని అమెరికా అధ్యక్షుడు డొనాల్డ్ ట్రంప్ తిరస్కరించడంతో ముడి చమురు ధరలు మళ్లీ భగ్గుమన్నాయి. 

  ఈ పరిణామాల నేపథ్యంలో ఆసియా మార్కెట్లలో సోమవారం ఉదయం క్రూడాయిల్ ఫ్యూచర్స్ ఒక్క శాతానికి పైగా బలపడ్డాయి. ప్రముఖ ఇంధన సూచీ అయిన బ్రెంట్ క్రూడ్ ఫ్యూచర్స్ బ్యారెల్‌కు 1.82 డాలర్లు పెరిగి 106.14 డాలర్ల మార్కును తాకగా, అమెరికా డబ్ల్యూటీఐ (WTI) క్రూడ్ ధర కూడా 1.14 డాలర్లు ఎగబాకి 93.55 డాలర్లకు చేరుకుంది. అంతర్జాతీయంగా కీలకమైన చమురు రవాణా మార్గమైన హార్ముజ్ జలసంధి వద్ద సరఫరాకు తీవ్ర అంతరాయం కలుగుతుందనే ఆందోళనలు మళ్లీ ముంచుకొస్తుండటంతో గ్లోబల్ మార్కెట్లు ఒక్కసారిగా అప్రమత్తమయ్యాయి.   ఇరాన్ పక్షం నుంచి దౌత్యపరమైన చర్చల ద్వారా సమస్య పరిష్కారానికి ప్రయత్నాలు జరుగుతున్నప్పటికీ, అమెరికా మాత్రం ఈ ప్రతిపాదనను తోసిపుచ్చడం మార్కెట్లపై తీవ్ర ప్రభావం చూపుతోంది.

 ప్రపంచ ఇంధన సరఫరా వ్యవస్థలో హార్ముజ్ జలసంధి అత్యంత కీలకమైన ప్రాంతం కావడంతో, ఇక్కడ నెలకొన్న ఉద్రిక్త పరిస్థితులు రాబోయే రోజుల్లో ధరలపై మరింత భారాన్ని మోపే అవకాశం ఉందని నిపుణులు అంచనా వేస్తున్నారు. మధ్యప్రాచ్య పరిణామాలను గ్లోబల్ ఇన్వెస్టర్లు ఎంతో ఆందోళనతో గమనిస్తున్నారు.