కుశాలపురంలో ఘనంగా కనకదుర్గ అమ్మవారికి కుంకుమార్చన
శ్రీకాకుళం, సూర్య : దేవి శరన్నవరాత్రి ఉత్సవాలను పురస్కరించుకుని ప్రముఖ వ్యాపారవేత్త, సమాజ సేవకుడు డాక్టర్ సూర శ్రీనివాసరావు ఆధ్వర్యంలో ఆయన స్వగ్రామమైన కుశాలపురంలో శ్రీ కనకదుర్గ అమ్మవారికి ప్రత్యేక కుంకుమార్చన నిర్వహించారు. వేద మంత్రోచ్ఛారణలు, మంగళవాయిద్యాల నడుమ భక్తిశ్రద్ధలతో జరిగిన ఈ కార్యక్రమంతో గ్రామంలో ఆధ్యాత్మిక సందడి నెలకొంది. నవరాత్రుల సందర్భంగా అమ్మవారిని ప్రత్యేకంగా అలంకరించి, వేద పండితుల ఆధ్వర్యంలో శాస్త్రోక్తంగా పూజలు నిర్వహించారు. కుశాలపురంతో పాటు పరిసర ప్రాంతాల నుంచి పెద్ద సంఖ్యలో భక్తులు, మహిళలు తరలివచ్చి అమ్మవారిని దర్శించుకుని ప్రత్యేక పూజల్లో పాల్గొన్నారు.
విద్యార్థులకు విద్యా సామగ్రి పంపిణీ : ఆధ్యాత్మిక కార్యక్రమంతో పాటు సామాజిక సేవకు ప్రాధాన్యమిస్తూ డాక్టర్ సూర శ్రీనివాసరావు విద్యార్థులకు పలకలు, పెన్నులు, పెన్సిళ్లను పంపిణీ చేశారు. విద్యార్థులను ప్రోత్సహించి, చదువుపై ఆసక్తిని పెంపొందించాలనే ఉద్దేశంతో ఈ కార్యక్రమాన్ని చేపట్టారు. అనంతరం భక్తులకు తీర్థప్రసాదాలు అందజేయడంతో పాటు అన్నదానం నిర్వహించారు.
ఆధ్యాత్మికతతో పాటు సేవాభావం అవసరం : ఈ సందర్భంగా డాక్టర్ సూర శ్రీనివాసరావు మాట్లాడుతూ, శ్రీ కనకదుర్గ అమ్మవారి ఆశీస్సులు గ్రామ ప్రజలందరిపై ఉండాలనే సంకల్పంతో స్వగ్రామంలో ప్రత్యేక పూజలు నిర్వహించడం ఆనందంగా ఉందన్నారు. ఆధ్యాత్మికతతో పాటు ప్రేమ, దయ, మానవత్వం, సేవాభావాన్ని ప్రతి ఒక్కరూ అలవర్చుకోవాలని సూచించారు.
గ్రామీణ ప్రాంతాల్లో ఇటువంటి కార్యక్రమాలు నిర్వహించడం వల్ల మన సంస్కృతి, సంప్రదాయాలు భావితరాలకు అందడంతో పాటు ప్రజల మధ్య ఐక్యత, సోదరభావం పెంపొందుతాయని పేర్కొన్నారు. పండుగలు కేవలం ఆచారాలకే పరిమితం కాకుండా సమాజానికి మేలు చేసే సేవా కార్యక్రమాలకు వేదిక కావాలని ఆకాంక్షించారు. కుశాలపురం గ్రామంతో పాటు పరిసర ప్రాంతాల ప్రజలందరూ ఆయురారోగ్యాలు, సుఖసంతోషాలతో వర్ధిల్లాలని అమ్మవారిని ప్రార్థించినట్లు తెలిపారు.ఈ కార్యక్రమంలో గ్రామ పెద్దలు, యువకులు, మహిళలు, విద్యార్థులు, భక్తులు, డాక్టర్ సూర శ్రీనివాసరావు అభిమానులు పాల్గొన్నారు. ప్రత్యేక పూజలు, విద్యా సామగ్రి పంపిణీ, అన్నదానంతో కార్యక్రమం భక్తిభావం, సేవాస్ఫూర్తిని చాటిచెప్పింది.
రిపోర్టర్ : గోపాల్ కృష్ణ, నరసన్నపేట, శ్రీకాకుళం జిల్లా.
