ఎన్నికల నేపథ్యంలో పటిష్ట పోలీసు భద్రతా చర్యలు

శ్రీకాకుళం, సూర్య : స్థానిక సంస్థల ఎన్నికల నేపథ్యంలో జిల్లాలో శాంతిభద్రతల పరిరక్షణకు పోలీసు శాఖ పటిష్ట చర్యలు చేపట్టింది. ప్రజల భద్రతను దృష్టిలో ఉంచుకుని శ్రీకాకుళం, టెక్కలి, కాశీబుగ్గ పోలీసు సబ్‌డివిజన్ల పరిధిలో ఎన్నికలు జరగనున్న సంబంధిత మండలాలు, పట్టణాల్లో 30 పోలీసు యాక్టు, 144 సెక్షన్ అమలులో ఉన్నాయని జిల్లా ఎస్పీ కె.వి. మహేశ్వర రెడ్డి ఆదివారం ఒక ప్రకటనలో తెలిపారు. అమలులో ఉన్న ఆంక్షలను ప్రజలు తప్పనిసరిగా పాటించాలని సూచించారు.

అనుమతులు తప్పనిసరి : పోలీసు ఆంక్షలు అమలులో ఉన్న ప్రాంతాల్లో ముందస్తు అనుమతి లేకుండా ర్యాలీలు, ధర్నాలు, నిరసన కార్యక్రమాలు, బహిరంగ సభలు, సమావేశాలు, ఊరేగింపులు నిర్వహించరాదని ఎస్పీ స్పష్టం చేశారు. సంబంధిత నిబంధనల ప్రకారం అనుమతించిన పరిమితులకు మించి గుంపులుగా గుమిగూడరాదని సూచించారు. ప్రధాన రహదారులపై అత్యవసర సేవలకు ఎలాంటి ఆటంకం కలిగించకూడదని తెలిపారు.

నిబంధనలు ఉల్లంఘిస్తే చర్యలు : అమలులో ఉన్న పోలీసు ఆంక్షలను ఉల్లంఘించి శాంతిభద్రతలకు విఘాతం కలిగించే వారిపై చట్టప్రకారం చర్యలు తీసుకుంటామని ఎస్పీ హెచ్చరించారు. ప్రజలకు ఇబ్బందులు కలిగించే చర్యలను ఉపేక్షించబోమని స్పష్టం చేశారు.

పోలీసులకు సహకరించాలి : ఎన్నికల కమిషన్ మార్గదర్శకాలను పాటిస్తూ జిల్లాలో ప్రశాంత వాతావరణాన్ని కాపాడేందుకు రాజకీయ పార్టీల నాయకులు, ప్రజాసంఘాల ప్రతినిధులు, యువత, ప్రజలు పోలీసు శాఖకు సహకరించాలని ఎస్పీ విజ్ఞప్తి చేశారు. ప్రజల భద్రత, శాంతిభద్రతల పరిరక్షణకు పోలీసు శాఖ నిరంతరం అప్రమత్తంగా పనిచేస్తుందని తెలిపారు.

రిపోర్టర్ : గోపాల్ కృష్ణ, నరసన్నపేట, శ్రీకాకుళం జిల్లా.