ఈనెల 19న కోదాడలో మెగా జాబ్ మేళా...సూర్యాపేట పట్టణ సీఐ వెంకటయ్య

నిరుద్యోగ యువతకు ఉద్యోగ అవకాశాల వేదిక

300 కంపెనీలకు పైగా పాల్గొనే అవకాశం.. యువత సద్వినియోగం చేసుకోవాలి...

*పోస్టర్ ఆవిష్కరించి అవగాహన ఆటోలను ప్రారంభించిన సూర్యాపేట పట్టణ సీఐ వెంకటయ్య 

సూర్యాపేట:

నిరుద్యోగ యువతకు ఉద్యోగ అవకాశాలు కల్పించడంతో పాటు ఉపాధి అవకాశాలను మరింత విస్తృతం చేయాలనే లక్ష్యంతో ఈనెల 19న కోదాడ పట్టణంలోని సెయింట్ జోసెఫ్ సీసీఆర్ విద్యానిలయంలో మెగా *జాబ్ మేళా నిర్వహించనున్నట్లు సూర్యాపేట పట్టణ సీఐ వెంకటయ్య* తెలిపారు. జాబ్ మేళాలో 300 కంపెనీలకు పైగా పాల్గొనే అవకాశం ఉన్నందున జిల్లాలోని నిరుద్యోగ యువత ఈ అవకాశాన్ని సద్వినియోగం చేసుకోవాలని ఆయన సూచించారు.తెలంగాణ రాష్ట్రంలో నిరుద్యోగ సమస్యను తగ్గించి యువతకు మెరుగైన ఉద్యోగ, ఉపాధి *అవకాశాలు కల్పించాలనే ఉద్దేశంతో రాష్ట్ర పౌరసరఫరాల శాఖ మంత్రి ఉత్తమ్ కుమార్ రెడ్డి* ఆధ్వర్యంలో ఈ మెగా జాబ్ మేళాను నిర్వహిస్తున్నట్లు సీఐ పేర్కొన్నారు.
*పోస్టర్ ఆవిష్కరణ.. అవగాహన ఆటోలు ప్రారంభం*
మంగళవారం సూర్యాపేట పట్టణ పోలీస్ స్టేషన్‌లో మెగా జాబ్ మేళాకు సంబంధించిన పోస్టర్‌ను సీఐ వెంకటయ్య ఆవిష్కరించారు. అనంతరం జాబ్ మేళాపై నిరుద్యోగ యువతకు అవగాహన కల్పించేందుకు ఏర్పాటు చేసిన రెండు ఆటోలను మైక్ సెట్లతో ప్రారంభించారు. ఈ ఆటోలు పట్టణంలోని వివిధ ప్రాంతాల్లో తిరుగుతూ జాబ్ మేళా తేదీ, వేదిక, రిజిస్ట్రేషన్ విధానం తదితర వివరాలను యువతకు తెలియజేయనున్నాయి.
*ఈ సందర్భంగా సీఐ వెంకటయ్య మాట్లాడుతూ*.. ఉద్యోగాల కోసం ఎదురుచూస్తున్న యువతకు ఒకే వేదికపై అనేక కంపెనీలను పరిచయం చేసే అవకాశం ఈ జాబ్ మేళా ద్వారా లభిస్తుందని తెలిపారు. అర్హత కలిగిన నిరుద్యోగ యువత ఈ అవకాశాన్ని ఎట్టి పరిస్థితుల్లోనూ కోల్పోకుండా జాబ్ మేళాలో పాల్గొనాలని కోరారు.

*క్యూఆర్ కోడ్‌తో సులభమైన రిజిస్ట్రేషన్*

జాబ్ మేళాకు సంబంధించిన పోస్టర్లలో అభ్యర్థులకు అవసరమైన పూర్తి వివరాలను పొందుపరిచారు. క్యూఆర్ కోడ్‌ను ఎలా స్కాన్ చేయాలి, ఎలా ఎన్‌రోల్ చేసుకోవాలి, లాగిన్ ప్రక్రియ ఎలా ఉంటుంది, తమకు నచ్చిన కంపెనీలను ఎలా ఎంపిక చేసుకోవాలి అనే అంశాలను పోస్టర్లలో స్పష్టంగా వివరించారు.
అభ్యర్థులు ముందుగానే రిజిస్ట్రేషన్ ప్రక్రియను తెలుసుకుని, అవసరమైన వివరాలతో జాబ్ మేళాకు హాజరైతే ప్రక్రియ మరింత సులభంగా ఉంటుందని సీఐ సూచించారు.
*కళాశాలల్లోనూ విస్తృత అవగాహన*

జాబ్ మేళాపై యువతలో అవగాహన కల్పించేందుకు ఇప్పటికే సూర్యాపేట పట్టణంలోని పలు ఇంటర్, డిగ్రీ, పీజీ కళాశాలలను సందర్శించి విద్యార్థులకు వివరాలు తెలియజేసినట్లు సీఐ తెలిపారు. ఉద్యోగ అవకాశాల కోసం ఎదురుచూస్తున్న యువతతో పాటు తమ విద్యార్హతలకు అనుగుణంగా ఉద్యోగాలను అన్వేషిస్తున్న అభ్యర్థులు ఈ మెగా జాబ్ మేళాలో పాల్గొని అవకాశాలను పరిశీలించుకోవాలని ఆయన పిలుపునిచ్చారు.
జాబ్ మేళా సమాచారం పట్టణంలోని ప్రతి నిరుద్యోగ యువతకు చేరేలా ప్రత్యేకంగా రెండు ఆటోలను మైక్ సెట్లతో ఏర్పాటు చేసి పట్టణంలోని వివిధ ప్రాంతాల్లో ప్రచారం నిర్వహిస్తున్నట్లు ఆయన తెలిపారు..
ఈ కార్యక్రమంలో ఎస్సైలు సందీప్ రెడ్డి, కనకరత్నం, పోలీస్ సిబ్బంది రామ నరసయ్య, శ్రీరాములు, రవి, తదితరులు పాల్గొన్నారు.