‘ఛాత్రోన్ కీ గూంజ్’పై బీజేపీ ఆగ్రహం

కాంగ్రెస్ అగ్రనేత రాహుల్ గాంధీ నిర్వహిస్తున్న 'ఛాత్రోన్ కీ గూంజ్' (విద్యార్థుల గళం) కార్యక్రమంపై తెలంగాణ బీజేపీ అధ్యక్షుడు ఎన్. రామచందర్ రావు తీవ్రస్థాయిలో ధ్వజమెత్తారు. బీజేపీ లేదా ఎన్డీయే పాలిత రాష్ట్రాల్లో పర్యటిస్తూ రాహుల్ గాంధీ విద్యార్థులను రెచ్చగొట్టే రాజకీయాలు చేస్తున్నారని ఆయన ఆరోపించారు.

రాహుల్‌ గాంధీకి నిజంగా ధైర్యం, విద్యార్థుల సంక్షేమంపై చిత్తశుద్ధి ఉంటే, యువతకు ఉద్యోగాలు మరియు స్కాలర్‌షిప్‌లు ఇస్తామని హామీ ఇచ్చి అధికారంలోకి వచ్చిన తెలంగాణకు రావాలని సవాల్ విసిరారు.

ప్రస్తుతం తెలంగాణ ప్రభుత్వం సుమారు ₹12,000 కోట్లకు పైగా ఉన్న ఫీజు రీయింబర్స్‌మెంట్ మరియు స్కాలర్‌షిప్ బకాయిలను కూడా చెల్లించలేని స్థితిలో ఉందన్నారు. దీనివల్ల రాష్ట్రవ్యాప్తంగా దాదాపు 20 లక్షల మంది విద్యార్థులు తీవ్ర ఇబ్బందులు పడుతున్నారని తెలిపారు.

బీజేపీ పాలిత రాష్ట్రాల్లో నాటకాలు ఆడటం మాని, తెలంగాణకు వచ్చి ఇక్కడి కాంగ్రెస్ ముఖ్యమంత్రికి విద్యార్థుల సమస్యల పరిష్కారంపై తగిన సలహాలు ఇవ్వాలని రామచందర్ రావు డిమాండ్ చేశారు.