1033 హెల్ప్లైన్ను అప్గ్రేడ్ చేయనున్న ఎన్హెచ్ఏఐ
న్యూఢిల్లీ: జాతీయ రహదారులపై ప్రయాణికులకు మరింత వేగవంతమైన, పారదర్శకమైన సహాయం అందించేందుకు 1033 హెల్ప్లైన్ సేవలను నేషనల్ హైవేస్ అథారిటీ ఆఫ్ ఇండియా (NHAI) ఆధునీకరించనుంది. ఆర్టిఫిషియల్ ఇంటెలిజెన్స్ (AI), రియల్-టైమ్ లొకేషన్ ట్రాకింగ్ మరియు స్మార్ట్ అత్యవసర ప్రతిస్పందన వ్యవస్థలతో తదుపరి తరం హెల్ప్లైన్ ప్లాట్ఫామ్ను రూపొందించేందుకు ఎన్హెచ్ఏఐ సన్నాహాలు చేస్తోంది.
ఈ నూతన వ్యవస్థ ద్వారా ప్రమాదాలు లేదా అత్యవసర పరిస్థితుల్లో కాల్ చేసిన వారి కచ్చితమైన లొకేషన్ను గుర్తించి, సమీపంలోని అంబులెన్స్, క్రేన్ లేదా పెట్రోలింగ్ వాహనాలను త్వరితగతిన ఘటనా స్థలానికి పంపడం సులభతరమవుతుంది. రోజుకు సుమారు 15,000 కాల్స్ నిర్వహిస్తున్న ఈ 24x7 హెల్ప్లైన్ను అభివృద్ధి చేసేందుకు ఇండియన్ హైవేస్ మేనేజ్మెంట్ కంపెనీ లిమిటెడ్ (IHMCL) పరిశ్రమ భాగస్వామ్యాల కోసం ఆసక్తి వ్యక్తీకరణను (EOI) ఆహ్వానించింది.
