రైతులు, ఉపాధ్యాయులపై పెండింగ్ కేసులన్నీ రద్దు

తమిళనాడు సీఎం జోసెఫ్ విజయ్ సంచలన ప్రకటన
చెన్నై: తమిళనాడు ప్రభుత్వం రైతులకు, ఉపాధ్యాయులకు అండగా ఉంటూ ఒక కీలకమైన, చారిత్రాత్మక నిర్ణయం తీసుకుంది. మే 2021 నుండి ఏప్రిల్ 2026 మధ్య కాలంలో ప్రజాస్వామ్యబద్ధంగా తమ హక్కులు, న్యాయమైన డిమాండ్ల కోసం శాంతియుత నిరసనలు తెలిపిన రైతులు, ఉపాధ్యాయులపై నమోదైన అన్ని కేసులను ఉపసంహరించుకుంటున్నట్లు ముఖ్యమంత్రి సి. జోసెఫ్ విజయ్ రాష్ట్ర శాసనసభ (అసెంబ్లీ)లో అధికారికంగా ప్రకటించారు.

మానవతా దృక్పథంతో, ప్రజాస్వామ్య సూత్రాలు మరియు హక్కులను గౌరవిస్తూనే ప్రభుత్వం ఈ కేసుల ఉపసంహరణ నిర్ణయాన్ని తీసుకుందని సీఎం తెలిపారు. తిరువణ్ణామలై జిల్లాలో సిప్కాట్ పారిశ్రామిక ప్రాంత ఏర్పాటుకు వ్యతిరేకంగా నిరసన తెలిపిన రైతులపై గతంలో నమోదైన కేసులతో పాటు, కొంతమందిపై మోపిన ‘గూండా చట్టం’ కేసులను కూడా ఎత్తివేస్తున్నట్లు స్పష్టం చేశారు.

పరందూరులో నూతన విమానాశ్రయ ప్రాజెక్టు వల్ల తమ వ్యవసాయ భూములు, నీటి వనరులు, జీవనోపాధి దెబ్బతింటాయని ఆందోళన చేపట్టిన రైతులపై గత ప్రభుత్వం అమానవీయంగా నమోదు చేసిన పెండింగ్ కేసులన్నింటినీ రద్దు చేస్తున్నట్లు వెల్లడించారు. ఈ నిర్ణయం ప్రభుత్వంపై సామాన్య ప్రజలకు ఉన్న విశ్వాసాన్ని మరింత బలోపేతం చేస్తుందని, ప్రజాస్వామ్య హక్కుల రక్షణకు తమ ప్రభుత్వం ఎల్లప్పుడూ కట్టుబడి ఉంటుందని ముఖ్యమంత్రి పునరుద్ఘాటించారు.