పరిపాలన, పౌరుల మధ్య ఐఐఎస్ అధికారులు కీలక వారధి

సమాచార, ప్రసార శాఖ కార్యదర్శి చంచల్ కుమార్
న్యూఢిల్లీ: ఇండియన్ ఇన్‌స్టిట్యూట్ ఆఫ్ మాస్ కమ్యూనికేషన్ (IIMC) 'డీమ్డ్ టు బి యూనివర్సిటీ'గా మారిన తర్వాత తొలిసారిగా ఇండియన్ ఇన్ఫర్మేషన్ సర్వీస్ (IIS) గ్రూప్-ఎ ఆఫీసర్ ట్రైనీలకు 'పబ్లిక్ కమ్యూనికేషన్ అండ్ గవర్నెన్స్‌'లో ఎంఏ (MA) పోస్ట్ గ్రాడ్యుయేట్ డిగ్రీలను ప్రదానం చేసింది. 2009, 2023, 2024 బ్యాచ్‌లకు చెందిన ఐఐఎస్ అధికారుల ముగింపు వేడుకలో కేంద్ర సమాచార, ప్రసార మంత్రిత్వ శాఖ కార్యదర్శి చంచల్ కుమార్ ముఖ్య అతిథిగా పాల్గొని ఈ పట్టాలను అందజేశారు.

ఐఐఎస్ అధికారుల పాత్ర కేవలం సమాచారాన్ని అందించడానికే పరిమితం కాదని, పరిపాలనకు మరియు పౌరుల ఆకాంక్షలకు మధ్య వారు బలమైన వారధిగా పనిచేస్తారని కొనియాడారు. సమాచార ప్రసార రంగంలో సాంకేతికత ప్రాముఖ్యత పెరుగుతోందని, ఏఐ (AI) యుగంలో తప్పుడు సమాచారం (Fake News), డీప్‌ఫేక్‌ల రూపంలో వస్తున్న సవాళ్లను సమర్థవంతంగా ఎదుర్కోవాలని పిలుపునిచ్చారు.

సమాచార మార్పిడిలో వేగం ఎంత ముఖ్యమో, కచ్చితత్వం మరియు విశ్వసనీయత కూడా అంతే ముఖ్యం. దీనిపై ఎట్టిపరిస్థితుల్లోనూ రాజీ పడకూడదన్నారు. అధికారులు తమ విధుల్లో అత్యంత పేద మరియు బలహీన వర్గాల సంక్షేమాన్ని కేంద్రబిందువుగా ఉంచుకొని, ప్రజల ఆందోళనలకు కరుణతో స్పందించాలని సూచించారు.

ఐఐఎంసి వైస్ ఛాన్సలర్ డాక్టర్ ప్రజ్ఞా పాలివాల్ గౌర్ మాట్లాడుతూ, యూనివర్సిటీ హోదా పొందిన తర్వాత తమ సంస్థ నుండి మొదటి ఎంఏ డిగ్రీలను ఐఐఎస్ ఆఫీసర్ ట్రైనీలే అందుకోవడం చారిత్రాత్మక పరిణామమని తెలిపారు. కమ్యూనికేషన్ అంటే కేవలం సమాచారం ఇవ్వడం మాత్రమే కాదని, ప్రజల్లో అవగాహన కల్పించడమేనని, అధికారులు నిష్పాక్షికత మరియు సున్నితత్వంతో విధులు నిర్వహించాలని కోరారు.