‘జన గంగ’తో ప్రజా ఉద్యమంగా మారిన నదీ పరిరక్షణ

న్యూఢిల్లీ: శతాబ్దాలుగా భారత నాగరికత, సంస్కృతి, జీవనోపాధికి మూలస్తంభమైన గంగానది పునరుజ్జీవనం కోసం 2014లో ప్రారంభించిన ‘నమామి గంగే’ (NGP) కార్యక్రమం ఇప్పుడు ఒక బృహత్తర ప్రజా ఉద్యమంగా రూపాంతరం చెందింది. ప్రభుత్వం చేపట్టిన మురుగునీటి శుద్ధి, అటవీకరణ, శాస్త్రీయ పర్యవేక్షణ చర్యలకు తోడు, ‘జన గంగ’ అనే పౌర భాగస్వామ్య స్తంభం నదీ పరిరక్షణలో సామాజిక యాజమాన్య భావనను పెంపొందిస్తోంది.

ప్రతి సంవత్సరం మార్చి 16 నుండి 31 వరకు ఉత్తరాఖండ్, ఉత్తరప్రదేశ్, బీహార్, జార్ఖండ్, పశ్చిమ బెంగాల్ మరియు ఢిల్లీలలో విద్యార్థులు, స్వచ్ఛంద కార్యకర్తలు తీర ప్రాంతాలను శుభ్రపరిచే కార్యక్రమాలను నిర్వహిస్తున్నారు. నదీ తీరాల స్థిరీకరణకు మొక్కలు నాటే కార్యక్రమాలను ముమ్మరం చేశారు. ఇందులో భాగంగా ‘ఏక్ పెడ్ మా కే నామ్’ ప్రచారం ద్వారా వ్యక్తిగత భావోద్వేగాలను పర్యావరణ బాధ్యతతో అనుసంధానిస్తున్నారు.

పాఠశాలలు, కళాశాలల్లో గంగా క్లబ్‌లు, ఎన్‌సిసి, ఎకో-క్లబ్‌ల ద్వారా వ్యాసాల పోటీలు, వర్క్‌షాప్‌లు, క్షేత్ర పర్యటనలు నిర్వహిస్తూ భవిష్యత్తు తరాల్లో పర్యావరణ స్పృహను పెంపొందిస్తున్నారు. గంగానదిని జాతీయ నదిగా గుర్తించిన సందర్భాన్ని పురస్కరించుకుని నిర్వహించే 'గంగా ఉత్సవ్', అంతర్జాతీయ యోగా దినోత్సవం మరియు బీఎస్‌ఎఫ్ (BSF) మహిళా బృందంతో నిర్వహించిన ‘రివర్ రాఫ్టింగ్’ వంటి కార్యక్రమాలు ప్రజలను నదితో మరింత మమేకం చేస్తున్నాయి.

కేవలం కాలుష్య నివారణకే పరిమితం కాకుండా, సమాజంలోని ప్రతి పౌరుడిని నదీ పరిరక్షణలో భాగస్వామిని చేస్తూ 'జన గంగ' కార్యక్రమం నూతన అధ్యాయాన్ని లిఖిస్తోంది.