భారత్-నేపాల్ మధ్య వాణిజ్య, అనుసంధాన చర్చలు

న్యూఢిల్లీ:వాణిజ్యం, రవాణా, అనుసంధాన రంగాలలో ద్వైపాక్షిక సంబంధాలను మరింత బలోపేతం చేసుకోవడమే లక్ష్యంగా భారత్-నేపాల్ అంతర్-ప్రభుత్వ ఉప-సంఘం (ఐజీఎస్‌సీ) సమావేశం న్యూఢిల్లీలో జరిగింది. సెప్టెంబర్ 16-17 తేదీలలో జరిగిన ఈ భేటీకి భారత వాణిజ్య శాఖ జాయింట్ సెక్రటరీ ఉజ్జ్వల్ కుమార్ ఘోష్, నేపాల్ పరిశ్రమల మంత్రిత్వ శాఖ జాయింట్ సెక్రటరీ బుద్ధ బహదూర్ గురుంగ్ నాయకత్వం వహించారు. ఇరు దేశాల నడుమ మార్కెట్ ప్రవేశం, కస్టమ్స్ ఆటోమేషన్, ప్రమాణాలు, ఆహార భద్రత మరియు ఔషధాల రవాణాలో ఎదురవుతున్న అడ్డంకులను తొలగించడంపై ప్రధానంగా చర్చించారు.

వ్యవసాయం, పాల ఉత్పత్తులు, ఆరోగ్య సంరక్షణ వస్తువులకు మార్కెట్ అవకాశాలను విస్తరించడంతో పాటు, ఎలక్ట్రానిక్ సర్టిఫికేషన్ ద్వారా సరిహద్దు తనిఖీలను మరింత సులభతరం చేయాలని ఇరుపక్షాలు నిర్ణయించాయి. అంతేకాకుండా రైలు, రోడ్డు మార్గాలు, లాజిస్టిక్స్, ఐసీపీ భూ-ఓడరేవుల మౌలిక సదుపాయాల మెరుగుదలపై సమీక్ష జరిపారు. అనధికార వాణిజ్యం, వాణిజ్య మోసాలను అరికట్టేందుకు ఇరు దేశాల ఏజెన్సీలు సమన్వయంతో పనిచేయాలని, సాంకేతిక అంశాలపై కాలపరిమితితో కూడిన చర్యలు చేపట్టాలని సమావేశంలో అంగీకారానికి వచ్చారు.