H-1B వీసాదారులకు బిగ్ షాక్

ఉద్యోగం పోతే 60 రోజుల గడువు రద్దుకు ట్రంప్ ప్రభుత్వం ప్రతిపాదన
వాషింగ్టన్: అమెరికాలోని విదేశీ ఐటీ నిపుణులకు, ముఖ్యంగా భారతీయ ఉద్యోగులకు ట్రంప్ ప్రభుత్వం గట్టి ఎదురుదెబ్బ తీసేందుకు సిద్ధమైంది. H-1B సహా పలు రకాల తాత్కాలిక పని వీసాలపై ఉన్న విదేశీ కార్మికులు ఉద్యోగం కోల్పోతే, అమెరికాలో ఉండి కొత్త ఉద్యోగం వెతుక్కునేందుకు ఇప్పటివరకు ఉన్న 60 రోజుల గ్రేస్ పీరియడ్‌ను రద్దు చేయాలని యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (DHS) ప్రతిపాదించింది.

ఫెడరల్ రిజిస్టర్‌లో ప్రచురించిన ఈ నూతన నిబంధనల ప్రతిపాదన ప్రకారం, ఉద్యోగం ఊడిన వెంటనే విదేశీ ఉద్యోగులు అమెరికా వదిలి వెళ్ళాల్సి ఉంటుంది. 2017 నుండి అమలులో ఉన్న ఈ 60 రోజుల సడలింపు రద్దయితే, ఉద్యోగులు తమ ఆస్తులను సర్దుకోవడానికి, పిల్లల చదువులను ముగించడానికి లేదా కొత్త స్పాన్సర్‌ను వెతుక్కోవడానికి ఏమాత్రం సమయం ఉండదు.

ఈ నిర్ణయం వల్ల టెక్ కంపెనీలకు తాత్కాలికంగా ఇబ్బందులు ఎదురైనప్పటికీ, ఆ ఖాళీలను స్థానిక అమెరికన్ కార్మికులతో భర్తీ చేసేందుకు వీలవుతుందని DHS పేర్కొంది. భారతీయ టెక్ దిగ్గజాలైన TCS, ఇన్ఫోసిస్, HCL, LTIMindtreeతో పాటు డెలాయిట్, PwC వంటి అంతర్జాతీయ కన్సల్టెన్సీలపై ఈ ప్రభావం తీవ్రంగా ఉండనుంది.

ఈ నియమ మార్పు కేవలం H-1Bలకే కాకుండా L-1 (కంపెనీ బదిలీలు), O-1 (అసాధారణ నైపుణ్యాలు), E-1, E-2, TN, E-3 మరియు H-1B1 వీసాదారులకు కూడా వర్తించనుంది. ఈ ప్రతిపాదనపై చట్టపరమైన తుది నిర్ణయం తీసుకునే ముందు రెండు నెలల పాటు ప్రజాభిప్రాయ సేకరణ చేపట్టనున్నారు.