వారికి రూ.2 లక్షలు,,,,మరో శుభవార్త చెప్పిన సీఎం రేవంత్ రెడ్డి
by Suryaa Desk |
Mon, Jan 12, 2026, 07:19 PM
తెలంగాణ రాష్ట్ర ప్రభుత్వం దివ్యాంగుల సంక్షేమం కోసం వినూత్న కార్యక్రమాలకు శ్రీకారం చుట్టింది. సామాజిక భద్రతతో పాటు ఆర్థిక భరోసా కల్పించడమే లక్ష్యంగా ముఖ్యమంత్రి రేవంత్ రెడ్డి ప్రజాభవన్లో పలు అభివృద్ధి పథకాలను ప్రారంభించారు. దివ్యాంగులను ప్రభుత్వం తన కుటుంబ సభ్యులుగా భావిస్తోందని.. వారిని ఆత్మగౌరవంతో బతికేలా చూడటమే తమ బాధ్యతని ముఖ్యమంత్రి ఈ సందర్భంగా స్పష్టం చేశారు.
దివ్యాంగుల అవసరాలను గుర్తించి.. సుమారు 50 కోట్ల రూపాయల వ్యయంతో వారికి అవసరమైన కృత్రిమ అవయవాలు, ట్రై సైకిళ్లు, ఇతర సహాయక ఉపకరణాలను పంపిణీ చేసే కార్యక్రమాన్ని ప్రభుత్వం చేపట్టింది. కేవలం పరికరాల పంపిణీకే పరిమితం కాకుండా.. సమాజంలో వారిని ప్రోత్సహించేందుకు మరికొన్ని కీలక నిర్ణయాలు తీసుకున్నారు. ఇద్దరు దివ్యాంగులు వివాహం చేసుకున్నా లేదా ఒక సాధారణ వ్యక్తి దివ్యాంగుడిని వివాహం చేసుకున్నా ప్రభుత్వ తరపున 2 లక్షల రూపాయల ఆర్థిక సాయం అందించనున్నట్లు ముఖ్యమంత్రి ప్రకటించారు. వృద్ధుల కోసం ప్రత్యేకంగా 'ప్రణామ్' పేరిట డే కేర్ సెంటర్లను ఏర్పాటు చేశారు. దీనితో పాటు చిన్న పిల్లల భవిష్యత్తు కోసం 'బాల భరోసా' పథకాన్ని కూడా అమలులోకి తెచ్చారు.
ప్రభుత్వ పాలనలో దివ్యాంగులకు సమాన అవకాశాలు కల్పించేందుకు ప్రభుత్వం ప్రణాళికాబద్ధంగా అడుగులు వేస్తోంది. ప్రభుత్వ ఉద్యోగ నియామకాల్లో దివ్యాంగులకు కేటాయించిన రిజర్వేషన్లను పక్కాగా అమలు చేస్తామని రేవంత్ రెడ్డి హామీ ఇచ్చారు. విద్యావంతులైన దివ్యాంగులకు తగిన ఉపాధి కల్పించడం ద్వారా వారిని స్వయం సమృద్ధి దిశగా నడిపించడమే లక్ష్యంగా పెట్టుకున్నారు.
శారీరక వైకల్యాన్ని అధిగమించి క్రీడల్లో రాణించే వారికి ప్రభుత్వం వెన్నుదన్నుగా నిలుస్తోంది. దీనికి నిదర్శనంగా పారాలింపిక్స్లో విజయం సాధించిన క్రీడాకారిణికి ప్రభుత్వ ఉద్యోగం కల్పించిన విషయాన్ని ముఖ్యమంత్రి గుర్తు చేశారు. దివ్యాంగుల ఆత్మస్థైర్యానికి మాజీ కేంద్ర మంత్రి జైపాల్ రెడ్డి నిదర్శనమని ముఖ్యమంత్రి కొనియాడారు. వైకల్యాన్ని ఒక అడ్డంకిగా భావించకుండా ఉత్తమ పార్లమెంటేరియన్గా ఎదిగిన ఆయన స్ఫూర్తితో ప్రతి ఒక్కరూ ఉన్నత శిఖరాలను అధిరోహించాలని కోరారు. దివ్యాంగుల సంక్షేమం కోసం ప్రభుత్వం కేటాయిస్తున్న ఈ నిధులు, పథకాలు వారి జీవితాల్లో కొత్త వెలుగులు నింపుతాయని భావిస్తున్నారు.
