తుమ్మిడిహట్టి బ్యారేజ్‌పై ఢిల్లీలో కీలక భేటీ: సెప్టెంబర్ 1న తెలంగాణ, మహారాష్ట్ర ఉన్నతాధికారుల సమావేశం

హైదరాబాద్ (సూర్య బ్యూరో): ప్రాణహిత నదిపై ప్రతిష్టాత్మకంగా ప్రతిపాదించిన తుమ్మిడిహట్టి బ్యారేజ్ నిర్మాణానికి సంబంధించి కీలక ముందడుగు పడింది. ప్రాజెక్టు సాంకేతిక, అంతర్రాష్ట్ర అంశాలపై చర్చించేందుకు కేంద్ర జల సంఘం (CWC) అధ్యక్షతన సెప్టెంబర్ 1న ఢిల్లీలోని సేవా భవన్‌లో ఉదయం 11 గంటలకు ఉన్నత స్థాయి సమావేశం జరగనుంది. ఈ భేటీకి తెలంగాణ, మహారాష్ట్ర జలవనరుల శాఖల ఉన్నతాధికారులు హాజరుకానున్నారు.
​సీఎం రేవంత్ రెడ్డి చొరవతో కదిలిన యంత్రాంగం
​ముఖ్యమంత్రి ఎ. రేవంత్‌రెడ్డి నిరంతర ప్రయత్నాల ఫలితంగానే కేంద్ర జల సంఘం ఈ సమావేశాన్ని ఖరారు చేసింది. ప్రాజెక్టును త్వరితగతిన ముందుకు తీసుకెళ్లేందుకు సీఎం రేవంత్ రెడ్డి వరుసగా సంప్రదింపులు జరిపారు:
​మహారాష్ట్ర ప్రభుత్వంతో చర్చలు: పరస్పర ఆమోదయోగ్యమైన పరిష్కారం కనుగొనేందుకు రెండు రాష్ట్రాల మధ్య సంయుక్త సమావేశం నిర్వహించాలని కోరుతూ మే 26న మహారాష్ట్ర సీఎంకు లేఖ రాశారు.
​కేంద్రం జోక్యం: ఈ అంశాన్ని ప్రధానమంత్రి నరేంద్ర మోదీ దృష్టికి తీసుకెళ్లగా, పీఎంఓ దీనిని కేంద్ర జలశక్తి శాఖకు నివేదించింది.
​జలశక్తి మంత్రికి వినతి: ప్రాజెక్టు వివాద పరిష్కారానికి కేంద్రం మధ్యవర్తిత్వం వహించాలని కోరుతూ ఆగస్టు 5న కేంద్ర జలశక్తి మంత్రి సి.ఆర్. పాటిల్‌కు సీఎం ప్రత్యేకంగా లేఖ రాశారు.
​152 మీటర్ల ఎత్తు సాధనే తెలంగాణ ప్రధాన లక్ష్యం
​గతంలో మహారాష్ట్ర సూచించిన 148 మీటర్ల ఎత్తు కాకుండా, బ్యారేజ్ ఎత్తును 152 మీటర్లకు పెంచేందుకు తెలంగాణ ప్రభుత్వం గట్టిగా ప్రయత్నిస్తోంది.
​గ్రావిటీ ప్రయోజనం: 148 మీటర్ల వద్ద గ్రావిటీ (సహజ ప్రవాహం) ద్వారా పూర్తిస్థాయి నీటిని తరలించడం సాధ్యం కాదు. దీనికి భారీ పంపులు వినియోగిస్తే భారీగా విద్యుత్ వ్యయం అవుతుంది.
​ఆర్థిక ప్రయోజనాలు: 152 మీటర్ల ఎత్తుతో ప్రాజెక్టు నిర్మిస్తే విద్యుత్ భారం తగ్గి, దీర్ఘకాలికంగా రాష్ట్రానికి గణనీయమైన ప్రయోజనం చేకూరుతుంది.
​పరిమిత ముంపు: సెంట్రల్ వాటర్ అండ్ పవర్ రీసెర్చ్ స్టేషన్ (CWPRS) నివేదిక ప్రకారం, జలమట్టం పెంచినా మహారాష్ట్ర భూభాగంలో అదనపు ముంపు చాలా స్వల్పంగానే ఉంటుందని తెలంగాణ స్పష్టం చేసింది.
​వెనుకబడిన, కరవు పీడిత ప్రాంతాలకు సాగునీరు అందించే తుమ్మిడిహట్టి ప్రాజెక్టును వేగంగా పట్టాలెక్కించేందుకు తెలంగాణ ప్రభుత్వం అన్ని స్థాయిల్లో కసరత్తు వేగవంతం చేసింది.